OQO-da úsh etnoqalashyq salynady
ShYMKENT. QazAqparat - Ońtústik Qazaqstan oblysynda úsh etnoqalashyq salynady. Dúnıejúzilik talaptarǵa saı qalashyqtar Shymkent, Túrkistan qalalary men Otyrar aýdanynda boı kóteredi.
Bul týraly Ońtústik Qazaqstan oblysynyń ákimi Janseıit Túımebaevtyń tóraǵalyǵymen ótken qala qurylysy keńesiniń kezekti májilisinde málim boldy. Sala mamandarynyń sózinshe, qalashyqtar kóne muralardy saqtap, týrısterge óńir tarıhyn keńinen nasıhattaý maqsatynda salynbaq, dep habarlaıdy QazAqparat HAA tilshisi.
Qazaqstan Respýblıkasy Sáýletshiler odaǵynyń tóraǵasy Aqmyrza Rústembekov pen elimizge tanymal sáýletshiler, sondaı-aq qalalyq ákimdiktiń ókilderi, sáýlet, qala qurylysy jáne qurylys isteri boıynsha jergilikti atqarýshy organdardyń, memlekettik sáýlet-qurylys basqarmasynyń basshylary qatysqan keńeste 10 sáýlettik joba qaraldy. Solardyń ishinde Túrkistan qalasyn álemdik deńgeıdegi tarıhı-mádenı ortalyq retinde damý tujyrymdamasyn bekitý, Otyrar aýdanyndaǵy «Arystanbab» kesenesiniń jáne «Kóne Otyrar» qalashyǵynyń aınalasyn abattandyrý men Shymkent qalasyndaǵy «Shymkent SITI» turǵyn úı kesheni janyndaǵy etnoqalashyqtyń eskızdik jobalary talqylandy.
«Elbasy «Bolashaqqa baǵdar: rýhanı jańǵyrý» maqalasynda týǵan jerimizdegi tarıhı keshenderdi qalypqa keltirý men olardy álemge tanytý jaıynda erekshe tebirenispen jazdy. Al elimizdegi arheologııalyq muralardyń basym bóligi Ońtústik Qazaqstan oblysynda. Sondyqtan kóne muralarymyzdy saqtaı otyryp, birlese keńesip jańa sáýlettik ǵımarattardy dúnıejúzilik talaptarǵa saı etip salýymyz qajet. Ol ǵasyrlarǵa qalatyn erekshe ǵımarattar bolýy tıis. Osyndaı sáýletti nysandarymyz arqyly týrısterdiń sanyn arttyrýǵa bolady»,-dedi Janseıit Qanseıituly. 
Aımaq basshysy birinshi kezekte týrızmdi damytýǵa úles qosatyn Túrkistan qalasy men Otyrar aýdanyndaǵy jobalardy tezdetip qolǵa alýdy tapsyrdy. Óıtkeni EKSPO-2017 kórmesi jaqyndap keledi. Atalǵan halyqaralyq kórme aıasynda oblysymyzǵa týrıster aǵylady dep josparlanyp otyr. Eń basty másele - týrıstik baǵyttaǵy aýdan-qalalardaǵy kósheler men ınfraqurylymdyq, servıstik qyzmetterdiń sapasyn jaqsartý bolyp otyr.
Aıta keteıik, Ońtústik Qazaqstan oblysy qala qurylysy keńesi biryńǵaı sáýlettik jáne qala qurylysy saıasatyn iske asyrý, qolǵa alynǵan jobalardyń sapasyn arttyrý úshin qurylǵan.
