OQO-da «Urpaqtar sabaqtastyǵy - ulttyń qundylyǵy» taqyrybynda arnaıy shara uıymdastyryldy
ShYMKENT. QazAqparat - «Urpaqtar sabaqtastyǵy - ulttyń qundylyǵy». «Serpilis» qoǵamdyq qory uıymdastyrǵan shara osylaı dep atalady. Taǵylymdy kezdesýde otty jyldary tutqynda bolǵan ardagerlerdiń ómiri men olardyń urpaqtarynyń kórgen qıyndyǵy keńinen aıtyldy. Kezdesýge qoǵamdyq uıymdardyń ókilderi, tarıh pániniń muǵalimderi, jalpy, táýelsiz elimizdiń tarıhyna beıjaı qaramaıtyn azamattar qatysty.
Bul joly kezdesýge Uly Otan soǵysyndaǵy áskerı tutqyndardyń urpaqtary qatysty. Bul býynnyń taǵdyry qatań. Sol kezdegi saıasattyń salqynyn sezgender «men soǵys ardageriniń ulymyn» dep te, marqaıyp, masattana almady. 1991 jyly atqan Táýelsizdik tańy ǵana tarlandardyń taıly tuıaǵyna jeńildik ákeldi. Maıdangerler sol kezdegi ortaq Otandy qorǵady. Erliktiń jarqyn úlgisin kórsetti. Eli úshin baryn saldy.
Bul sharanyń maqsaty - soǵysqa baılanysty tumandy, kúmándi kórinetin derekterdi jaryqqa shyǵarý, talaı jyl taǵdyr tezgisinen ótkenderge jubanysh sezimin saılaý. «Elim!» degen erlerdiń adamdyǵy men azamattyǵy - búgingi óskeleń urpaqqa úlgi, ónege. Ótkenimizdi eske alyp, el úshin basyn báıgege tikkenderdi umytpaı, ulyqtaý da - eldigimizdiń belgisi.
