OQO-da «Ulttyq mura» stýdentter murajaıy ashyldy
ShYMKENT. QazAqparat - Bıyl Ońtústik Qazaqstan memlekettik pedagogıkalyq ınstıtýtyna 80 jyl tolyp otyr. Osy aıtýly dataǵa oraı stýdentter murajaıy ashyldy. Sondaı-aq oqý orny ýnıversıtet bolyp ózgerdi, dep habarlaıdy QazAqparat tilshisi.
Talaı talant túlep ushqan bilim ordasyndaǵy merekelik shara aıasynda stýdentter qalashyǵyndaǵy ǵımarattan «Ulttyq mura» stýdentter murajaıy saltanatty túrde ashyldy. Munda kóneniń kózi, urpaq sanasyna ulttyq dástúrdi sińiretin 100-ge jýyq eksponat qoıylǵan. Bul kúni sonymen qatar stýdentter jataqhanasynyń aldynan ashyq sport alańshasy paıdalanýǵa berildi. 80 jyldyqqa oraı taǵy 80 túp aǵash otyrǵyzyldy. Oǵan ýnıversıtet ujymy men baıyrǵy túlekter bolyp, barlyǵy bir kisideı atsalysty. Aıtýly shara aıasynda ýnıversıtet ishinen «Kórkem ádebıet» ortalyǵy da ashyldy. Onda ınstıtýttyń damý tarıhynda eńbegi sińgen Ázimhan Ospanuly men Kerimbek Syzdyqovtyń kitaptary qoıylǵan.
Budan bólek, «Sándik óner» ortalyǵy, «Nur Shańyraq» stýdentter teatrynyń tusaýy kesildi. Mereıtoı barysynda halyqaralyq ǵylymı-teorııalyq konferentsııa, «Órkendegen Ońtústik» atty respýblıkalyq aqyndar aıtysy ótti.
Aıta keteıik, irgeli oqý ornynyń irgetasy sonaý 1937 jyly qalandy. Alǵashqyda eki jyldyq muǵalimder ınstıtýty bolyp ashylyp, 4 kafedra ǵana jumys istedi. Instıtýttyń derbes ǵımaraty da bolmady. Ustazdar qaladaǵy mektepterdiń bólmelerinde dáris oqydy. Soǵan qaramastan, el mektepterine asa qajet bolǵan muǵalimderdi daıarlap shyǵardy. Toqsanynshy jyldardaǵy reformalaý kezinde kelbeti kómeskilenip, ataýy umyt bola bastady. Tek el táýelsizdiginiń 20 jyldyq mereıli merekesiniń tusynda ǵana bilim ordasy qaıta eńse tiktedi. Úkimet qaýlysymen óz aldyna derbes ınstıtýt bolyp quryldy. Búginde ordaly oqý ornyna aınaldy.
