OQO-da ulaǵatty ustazdar marapattaldy
ShYMKENT. QazAqparat - Ońtústik Qazaqstan oblysynda ulaǵatty ustazdar marapattaldy. Otyrar aýdanynyń ákimi Erlan Aıtahanov ardager ustazdar men bilim salasynyń damýyna súbeli úles qosyp júrgen bilikti muǵalimderdi qabyldap, olarmen bolashaq urpaq tárbıesi men bilim deńgeıi jaıynda keńinen áńgimelesti, dep habarlaıdy QazAqparat tilshisi.
Kezdesý barysynda ulaǵatty ustazdar bilim salasynda tolǵandyryp júrgen oılaryn ortaǵa salyp, aldaǵy arman-maqsattarymen bólisti. Ótken jyldardaǵy bilim berý júıesi men tehnologııasy damyǵan búgingi kúnniń jańa baǵdarlamalary aıasynda muǵalimderdiń oı-pikirin tyńdaǵan aýdan basshysy ustazdar qaýymynyń eń basty mindeti bilim berýde ǵana emes, sonymen birge adam boıyndaǵy barlyq jaqsy qasıetterdi de qosa sińirý ekendigin atap ótti. Bilim salasy qyzmetkerlerin kásibı merekelerimen quttyqtady.
«Mektep tabaldyryǵynan tarydaı bolyp kirgen balanyń tulǵa bolyp qalyptasýyna deıingi ustanymdary men bilim dárejesiniń joǵary bolýy onyń eń birinshi mektepte qalaǵan irgetasynyń myqtylyǵyna baılanysty. Al, sol irgetasynyń berik bolyp qalanýyna birden bir sebepker-ustazdar sizdersizder»,-dedi Erlan Aıtahanov. 
Kezdesýde ustaz bedelin kóterý, bilim deńgeıin arttyrý, ustaz ben shákirt arasyndaǵy baılanysty jaqsartý, mektep qabyrǵasyndaǵy bala tárbıesi jóninde keleli áńgimeler órbidi. Áńgime barysynda muǵalimder aýdan basshysynyń ustazdar qaýymyna degen ystyq yqylasy men qurmetine rızashylyqtaryn bildirdi.
Beıresmı kezdesýde ustazdardy erkin áńgimelesýge tartqan aýdan basshysy Erlan Aıtahanov ulaǵatty jandar tarapynan aıtylǵan usynys-pikirler eskeriletinin aıtyp, muǵalimderge merekelik syı-sııapat jasady.
