OQO-da TJD qyzmetkerleri narkologııalyq dıspanser ǵımaratyndaǵy órt shyǵý sebebin anyqtaýǵa kiristi
ShYMKENT. QazAqparat - Shymkentte órtke oranǵan aýrýhana boıynsha óńirdiń órt sóndirý qyzmeti men qalalyq ákimdik málimet taratty. Belgili bolǵandaı, jalyn oblystyq narkologııalyq dıspanserdiń 2 qabatty ákimshilik ǵımaratynan shyqqan.
Jalpy kólemi 1939 sharshy metrdi quraıtyn ǵımarattyń 150 sharshy metri janyp ketken. Tilsiz jaýdy aýyzdyqtaýǵa jeke quramnyń 115 qyzmetkeri men 13 tehnıka jumyldyryldy. Ǵımaratta bolǵan 20 adam basqa jaqqa kóshirilgen. Abyroı bolǵanda, órtten zardap shekkender joq. Jalyn kúndizgi 12.36-da sóndirildi. 
Aıta keteıik, búgin kúndizgi 12-ler shamasynda Ońtústik Qazaqstan oblystyq narkologııalyq dıspanserinen órt shyǵyp, dárigerler men naýqastar abyr-sabyr kúıge túsken bolatyn. Ákimshilik ǵımaratynyń shatyrynan shyqqan tútin áp-sátte qyzyl jalynǵa ulasty. Bastapqyda dárigerler ony óz kúshterimen sóndirmekshi bolǵan kórinedi. Keıinnen aýyzdyqtaı almasyn bilgen soń, órt sóndirýshilerdi shaqyrtqan. Oblystyq tótenshe jaǵdaılar departamenti mamandary qazir órttiń shyǵý sebepteri men shyǵyn kólemin anyqtaýda.
