OQO-da tuzdanǵan topyraqtardy jańa ınnovatsııalyq tehnologııalar arqyly ıgerý jaıy talqylandy
ShYMKENT. QazAqparat - Ońtústik Qazaqstan oblysynda «Tuzdanǵan topyraqtardy jańa ınnovatsııalyq tehnologııalardy qoldaný arqyly júgeri daqylynyń ónimin arttyrý» taqyrybynda halyqaralyq dalalyq semınar ótti. Onda Túrkııa, Qytaı, Ózbekstan jáne Qyrǵyzstannyń aýyl sharýashylyq ónimimen shuǵyldanatyn kompanııa basshylary jáne menedjerler, sondaı-aq, elimizge belgili ǵalymdar, oblystyq aýyl sharýashlyǵy basqarmasynyń qyzmerkerleri ózara tájirıbe almasty, dep habarlaıdy QazAqparat HAA tilshisi.
Semınardy saltanatty túrde ashqan Otyrar aýdanynyń ákimi Erlan Aıtahanov Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasyna toqtalyp ótti. Óńirdegi ekologııalyq apattyń aldyn-alý men topyraqtyń qunarlylyǵyn arttyrý, sharýalardyń eńbek ónimderin eseleý maqsatynda qolǵa alynǵan jobalardy baıandady. Júgeri klasterin damytý jáne sýarmaly jerlerdiń tuzdanýy máselelerin, sý tapshylyǵyn sheshý baǵytynda atqarylyp jatqan jumystarǵa da keńinen toqtaldy. Al, Qazaq topyraqtaný jáne agrohımııa ǵylymı - zertteý ınstıtýtýnyń bas dırektory Abdýlla Saparuly elimizdegi topyraq degradatsııasy jáne olardyń qunarlaǵyn joǵarlatýdyń qazirgi zamanǵy ádisteri jóninde arnaıy baıandama jasady. Túrkııa elinen kelgen «Túrik selektsııa ortalyǵynyń» ókili Hýseıin Altynshash júgeri uryǵynyń sapasy jóninde qysqasha habarlama jasady.
Semınar barysynda Ordabasy, Báıdibek, Saryaǵash aýdandary men Arys qalasynan kelgen qonaqtar men sharýashylyq tóraǵalary «Aqtóbe-Agro» aýyl sharýashylyǵy óndiristik kooperatıvinde bolyp, 105 gektar jerge egilgen júgeriniń jańa sortymen tanysty. Atalmysh kooperatıv ókili Elǵondy Álmahanovtyń aıtýynsha, atalǵan sharýashalyq aldyńǵy jyldary júgeriden 50-60 tsenttnerden ónim alyp kelgen. Bıyl ınstıtýt ǵalymdarmen birlesip jasaǵan jumystyń nátıjesinde gektaryna 130-140 tsentnerden ónim alýdy josparlap otyr eken. Júgeriniń jańa sortyna semınarǵa qatysýshy sharýalar «Otyrar» nemese «Oqsyz» ataýyn berý týraly usynystaryn ortaǵa saldy. Jıyndy qorytyndylaǵan aýdan basshysy otyrarlyqtar jyl saıyn júgeri daqylynyń kólemin ulǵaıtyp qana qoımaı, ony tereń óńdeýdi myqtap qolǵa alǵandyǵyna basa aıtty. Sonymen qatar jer asty sýynyń deńgeıin tómendetý maqsatynda kollektr, drenaj júıelerin qalpyna keltirý jáne sý tapshylyǵyn joıý maqsatynda «Syrdarııa-Arys» (Aqyn-Jaqyp) kanalyn qalpyna keltirý boıynsha tıisti jumystar atqarylyp jatqanyn atap ótti.
