OQO-da túıe sútin óndiretin kooperatıv qurylady
ASTANA. QazAqparat - Osy baǵyttaǵy jumysty bastaǵan Sozaq aýdanynyń ákimi M.Isaev Teriskeıde túıe sútin óndirý boıynsha kooperatıv qurý máselesi boıynsha jıyn ótkizdi, dep habarlaıdy oblys ákimdiginiń baspasóz qyzmeti.
Ońtústik Qazaqstan oblysynń ákimi B.Atamqulov ótken 2015 jyly atqarylǵan jumystar týraly halyq aldynda bergen esebinde Sozaq, Báıdibek aýdandarynda mal sharýashylyǵyn damytý boıynsha jumystar jasalyp, Túrkistan, Arys, Otyrar, Sozaqtan túıe sútin jınaý beketteri ashylady degen bolatyn. Bul jumystar osy josparlar negizinde uıymdastyrylyp otyr.
Jıynǵa aýyl sharýashylyǵy mınıstrligi mal sharýashylyǵy ónimderin qaıta óńdeý departamenti dırektorynyń orynbasary B.Negmashov, oblystyq aýyl sharýashylyǵy basqarmasy basshysynyń orynbasary P.Tastanbekov jáne aýdandaǵy sharýa qojalyq ıeleri qatysty. Mınıstrlik mamandary áýeli Sozaq, Qaraǵur, Sholaqqorǵan aýyldaryndaǵy túıe sharýashylyǵynyń jaı kúıimen tanysty.
Aýdanǵa arnaıy is-saparmen kelgen B.Negmashov Sozaqta túıe sútin óńdeıtin qurylǵyny lızıngke berýge bolatynyn jetkizdi.
«Qazirgi tańda, sharýalardyń aldynda turǵan negizgi másele ónimdi óńdeý jáne ótkizý ekeni belgili. Bul máseleni sheshýdiń birden bir zamanaýı joly sharýalardyń kooperatıvke birigip, ónim óndirýge, tasymalǵa ketetin shyǵyndy azaıtý», - dedi mınıstrlik ókili.
Oblystyq aýyl sharýashylyǵy basqarmasy basshysynyń orynbasary P.Tastanbekov sharýa qojalyqtaryna kooperatıvtiń qurylymy men aldaǵy turǵan mindetterin túsindirse, «Qaraǵur» túıe sharýashylyǵynyń tóraǵasy J.Sadyrhanov bul jumystardyń úkimet tarapynan sharýalarǵa jasalyp jatqan zor múmkindik ekenin aıtyp, kooperatıvke múshe bolatynyn jetkizdi.
Jıyn sońynda aýdan ákimi túıe sútin óńdeý boıynsha qurylatyn kooperatıvke aýdan ákimdigi tarapynan jan-jaqty qoldaý jasalatynyn aıtyp, sharýalardy birigýge shaqyrdy. Sáýir aıynda kooperatıvtiń jarǵysy daıyndalyp, odan ári negizgi jumystar júrgizilmek.
