OQO-da turmystyq zorlyq-zombylyq azaıǵan
ShYMKENT. QazAqparat - Ońtústik Qazaqstan oblysynda turmysta jasalǵan qylmystardyń aldyn alý maqsatynda «Turmys» jedel-profılaktıkalyq is-sharasy ótti. Sondaı-aq «Otbasyndaǵy zorlyq-zombylyqsyz Qazaqstan» pılottyq jobasy aıasynda aktsııalar uıymdastyryldy. Nátıjesinde otbasy-turmystyq saladaǵy qylmystar 5,9 paıyzǵa tómendedi. Búgin bul týraly OQO óńirlik kommýnıkatsııalar qyzmetinde ótken brıfıngte Oblystyq jergilikti polıtsııa qyzmetiniń bastyǵy Ábdiǵanı Seıdýalıev málim etti, dep habarlaıdy QazAqparat tilshisi.
Ábdiǵanı Seıdýalıevtiń sózinshe, qoǵamdyq oryndarda jasalǵan qylmystar 26,4 paıyzǵa, al kóshede jasalǵan qylmystar 32,9 paıyzǵa tómendegen. Jalpy bótenniń múlkin urlaý qylmystary 12,4 paıyzǵa, mal urlyǵy qylmystary 18,8 paıyzǵa kemigen.
«Jol-kólik oqıǵalaryn aldyn alý, sondaı-aq oblys avtojoldarynda qalyptasqan jedel jaǵdaıdy jaqsartý, avtoapattylyq deńgeıin azaıtý, aýyrtpashylyqty tómendetý maqsatynda, aǵymdaǵy jyly oblys aýmaǵynda «Qaýipsiz jol», «Jaıaý júrginshi», «Abaılańyz balalar», «Avtobýs», «Mas júrgizýshi-qylmysker» jedel-profılaktıkalyq is-sharalary ótkizilip, óz jalǵasyn tabýda», - dedi Ábdiǵanı Toıshyuly.
Al, profılaktıkalyq sharalardyń nátıjesinde oblys aýmaǵyndaǵy joldarda oryn alǵan jol kólik oqıǵalary 5,9 paıyzǵa tómendegen. Alaıda oblystyq jáne jergilikti mańyzdy avtojoldarda bolǵan 801 JKO-nyń saldarynan 142 tulǵa qaza taýyp, 1133 tulǵa ártúrli dene jaraqat alǵan.
Budan bólek, tabıǵatty qorǵaý salasy boıynsha 170 qylmystyq ister qozǵalyp, 624 ákimshilik quqyqbuzýshylyq jáıtteri anyqtalǵan. OQO ІІD Jergilikti polıtsııa qyzmetiniń qurylymdary múddeli memlekettik organdarmen birlese otyryp «Tabıǵat», «Qyzǵaldaq», «Ýyldyryq», «Jer qoınaýy» syndy aldyn alý is-sharalaryn uıymdastyryp keledi.
