OQO-da túrkııalyq «Ostim» ındýstrıaldy aımaǵynyń ókildigi ashyldy
ShYMKENT. QazAqparat - Ońtústik Qazaqstan oblysy men Túrkııa Respýblıkasynyń ındýstrıaldy aımaqtary budan keıin tyǵyz baılanysta jumys istep, birlesken jobalar aıasynda yntymaqtastyq ornatpaq.
Jumystardyń shuǵyl jáne nátıjeli bolýy úshin «Ońtústik» ındýstrıaldy aımaǵynyń ǵımaratynan Túrkııa Respýblıkasynyń «Ostim» ındýstrıaldy aımaǵynyń ókildigi ashyldy. Mundaı sheshimge 1-3 aqpan aralyǵynda óńirimizde ótip jatqan «Qazaqstan-Túrkııa ınvestıtsııalyq forýmy» aıasynda qos memlekettiń salalyq jetekshileriniń arasynda bolǵan ózara kezdesýlerde túzilgen memorandým aıasynda qol jetkizildi, dep habarlaıdy OQO ákiminiń basapsóz qyzmeti.
Endi «Ońtústik» ındýstrıaldy aımaǵynyń jetekshiligi budan keıingi jumystaryn júıelep, jetildirýde Túrkııanyń damý tájirıbesin paıdalanatyn bolady. Óıtkeni, Ankaradaǵy 5200 kásiporynnyń basyn biriktirgen «Ostim» ındýstrıaldy aımaǵy 50 jyldan beri damýdyń úzdik tájirıbesin kórsetip keledi.
Atalǵan sheteldik ındýstrıaldy aımaqtyń quryltaıshylar keńesiniń tóraǵasy Orhan Aıdyn bul jumystardyń qos memleket kásipkerleri úshin de tıimdi bolaryna senim bildirip, «Ońtústik» ındýstrıaldy aımaǵynyń da ókildigi, ıaǵnı, bas keńsesi Túrkııanyń astanasynan ashylatynyn jetkizdi.
Al «Ońtústik» ındýstrıaldy aımaqtary basqarýshy kompanııasynyń bas dırektory Muhtar Turabekovtyń aıtýynsha, birlesken yntymaqtastyq jumystarynyń arqasynda ortaq brendpen, ne bolmasa, jeke dara ónim ázirlenip, naryqqa shyǵarylady.
Aıta keteıik, oblysta shaǵyn jáne orta bıznesti damytý men óńirge kóptep ınvestıtsııa tartý maqsatynda ashylǵan 11 ındýstrıaldy aımaq jumys isteıdi. Sonyń biri - «Ońtústik» ındýstrıaldy aımaǵyna 84 kásiporyn kirse, búginde, onyń 46-sy 2500-ge jýyq turǵyndy turaqty jumyspen qamtyp otyr. 
