OQO-da «Túrkistan - Túrki áleminiń mádenı astanasy» jobasy qorytyndylandy
ShYMKENT. QazAqparat - Búgin «Túrkistan - Túrki áleminiń mádenı astanasy» jobasy aıasynda ótkizilgen is-sharalardyń qorytyndysy boıynsha jıyn ótti. Oblys ákimi Janseıit Túımebaevtyń tóralyǵymen ótken jıynda halyqaralyq deńgeıdegi sharalardy joǵary deńgeıde uıymdastyrýǵa belsene qatysqandar marapattaldy, dep habarlaıdy QazAqparat tilshisi.
Jıynda «Qazaqstan-Túrkııa arasyndaǵy dostyq pen yntymaqtastyqty damytqany úshin» medali oblystyq máslıhattyń hatshysy Qaırat Balabıevke, oblystyq máslıhattyń depýtattary Ómirzaq Meldehanov pen Serikjan Seıtjanovqa, oblystyq ardagerler keńesiniń tóraǵasy Jeńisbek Máýlenqulovqa, «OQO Azamattyq Alıansy» zańdy tulǵalardyń qaýymdastyq nysanyndaǵy birlestiginiń tóraǵasy, oblystyq máslıhattyń depýtaty Jamalbek Sháripbekke, Túrkistan qalasynyń ákimi Álipbek Óserbaevqa jáne Q.A.ıAsaýı atyndaǵy Halyqaralyq qazaq-túrik ýnıversıtetiniń rektory Ýalıhan Ábdibekovke tabystaldy.
«Ótken jyldyń jeltoqsan aıynda TÚRKSOI Turaqty Keńesiniń otyrysynda Túrki áleminiń 2017 jylǵy mádenı astanasy bolyp, Er túriktiń besigi bolǵan Túrkistannyń jarııalanýy elimiz úshin, onyń ishinde Ońtústik óńiri úshin zor maqtanysh boldy. Biz bıyl Ulystyń Uly kúni - Naýryz merekesinen bastaý alǵan búkil túrki jurtyna ortaq «Túrkistan - Túrki áleminiń mádenı astanasy» aıasynda jyl boıy halyqaralyq deńgeıdegi 40-tan astam túrli is-sharalardy atap óttik. Osynaý mańyzdy sharany barynsha joǵary deńgeıde ótkizýge bar kúsh-jigerimiz ben ynta-yqylasymyzdy saldyq. Halyqaralyq is-sharalardy uıymdastyrýǵa belsene qatysqandaryńyz úshin shynaıy alǵysymdy bildiremin»,-dedi oblys ákimi.
Sonymen qatar, jıynda oblys ákiminiń orynbasary Ulasbek Sádibekovke TÚRKSOI Halyqaralyq uıymynyń bas hatshysy Dúısen Qaıseıinovtiń Alǵys haty men arnaıy syılyǵy tapsyrylsa, oblys ákiminiń Alhys hatymen oblystyq máslıhatynyń depýtattary, aýdan, qala ákimderi jáne basqarma basshylary marapattaldy.
Májilis sońynda aımaq basshysy aldaǵy Elimizdiń Táýelsizdik merekesimen quttyqtap, jyldan jylǵa basty qundylyqtarymyz - Táýelsizdik, Beıbitshilik pen Ulttyq birligimiz nyǵaıa bersin, dep sózin qorytyndylady.
