OQO-da týrızm basqarmasy qurylatyn boldy
ShYMKENT. QazAqparat - Aldaǵy ýaqytta Ońtústik Qazaqstan oblysynda týrızm basqarmasy qurylatyn boldy. Bul jóninde oblys ákimi Janseıit Túımebaev Saıramdaǵy Hanqorǵan tóbesiniń mańynda tarıhı eskertkishterdi qalpyna keltirý boıynsha ótken alqaly jıynda málimdedi. Aımaq basshysynyń sózinshe jańadan qurylatyn basqarma týrızmdi júıeli túrde damytýǵa yqpal etedi, dep habarlaıdy QazAqparat tilshisi.
Janseıit Qanseıitulynyń aıtýynsha, oblys aýmaǵynda Aqsý jabaǵyly qoryǵy men Qasqasý demalys aımaǵy, Syrdarııa ózeni men Shardara sý qoımasynyń jaǵasy sekildi tabıǵaty ásem jerlerge týrısterdi tartý boıynsha arnaıy josparlar jasalynyp jatyr eken.
«Men qazir oblysymyzdaǵy týrızm salasyna kóp kóńil bólemin. Oblysta arnaıy týrızm basqarmasyn qurý jaıly sheshim qabyldadym. Sebebi, týrızm degendi kóp adamdar qydyrý dep oılaıdy. Týrızm qydyrý emes, týrızm týrısttik ındýstrııa. Ol jeke úlken bir sala. Sebebi onyń ishine barlyǵy kiredi. Týrıster kelý úshin qonaqúıler kerek, meıramhana, dámhanalar, túrli demalatyn oryndar qajet», - dedi Janseıit Qanseıituly.
Sonymen qatar, óńir basshysy óz sózinde týrızmi jaqsy damyǵan Túrkııa, Germanııa sekildi elderdi mysal retinde aıtyp ótti. Bir ǵana túrikterdiń ózi jylyna týrızmniń arqasynda qazynasyna 40 mıllıard dollar qarjy túsiredi eken.
