OQO-da týrısterge arnalǵan qalashyq salynady
ASTANA. QazAqparat - Mundaı kelisimge «Ontustik Tourism-2016» Halyqaralyq týrıstik forýmy barysynda qol jetkizildi, dep habarlaıdy QazAqparat OQO ákimdiginiń baspasóz qyzmetine silteme jasap.
«Saıram-Ógem memlekettik ulttyq tabıǵı parki» RMM aýmaǵynda salynatyn «Eko Kempıng» jobasynyń qurylysy keler jyly bastalady.
Halyqqa qol jetimdi baǵada usynylatyn shatyrly qalashyq týrıstke qajetti barlyq jabdyqtarmen qamtylatyn bolady. Taǵy bir aıta ketetin jaıt, mundaǵy jaryqtandyrý kún batareıalary esebinen júzege asady.
Ońtústiktiń týrıstik áleýeti men taý týrızmin jáne alpınızmdi damytý maqsatynda qolǵa alynǵan jobany «Saıram-Ógem memlekettik ulttyq tabıǵı parki» RMM men «Ontustik» alpınızm Federatsııasy birlese iske asyrmaq.
Sonymen qatar, búgingi týrıstik forýmda birqatar sheteldik kompanııalarmen birlesken jobalardy júzege asyrý maqsatynda 7 memorandýmǵa qol qoıyldy. Olar, Saryaǵashta jańa kýrort qalashyǵyn salý, týrızm mektebin qurý jəne halyqaralyq avtodəliz jolynyń boıynda qyzmet kórsetetin birqatar nysandardy salý jobalary bolyp tabylady. Sondaı-aq, shara barysynda óńirge ınvestıtsııa tartý baǵytynda birqatar kelisimder jasaldy.
Eske salaıyq, búgin tańerteń jumysyn bastaǵan «Ontustik Tourism-2016» týrıstik forýmy týrızm salasyndaǵy óńiraralyq jáne halyqaralyq seriktestikterdi damytýǵa jáne iskerlik qatynastardy ornatýǵa múmkindik beredi. Forýmǵa 300-den astam qazaqstandyq jáne sheteldik qonaqtar qatysýda.
