OQO-da tuńǵysh ret el Prezıdentiniń júldesine arnalǵan halyqaralyq týrnır bastaldy (FOTO)
ShYMKENT. QazAqparat - Ońtústik Qazaqstan oblysynda alǵash ret QR Prezıdentiniń Kýbogine arnalǵan jasóspirimder arasyndaǵy fýtboldan halyqaralyq týrnır bastaldy, dep habarlaıdy oblys ákimdiginiń baspasóz qyzmeti.
ІH Halyqaralyq týrnırdiń saltanatty ashylý rásimine qatysqan oblys ákiminiń orynbasary U.Sádibekov sharany ashyp berip, qatysýshylarǵa sáttilik tiledi.
«2008 jyly Almaty qalasynda bastaý alǵan bul halyqaralyq týrnır, keıingi 6 jylda Elordamyz Astana qalasynda ótip keldi. Qazaqstan Fýtbol federatsııasynyń usynysyna oraı, bizdiń qoldaýymyzben 2016 jyly 9-týrnır Shymkent qalasynda ótkizilip otyr. Osy sátti paıdalana otyryp, Qazaqstan fýtbol federatsııasy basshylyǵyna oblys ákimi jáne oblys turǵyndary atynan shynaıy alǵysymdy bildiremin», - dedi oblys ákiminiń orynbasary.
El Táýelsizdiginiń 25 jyldyǵyna oraı, Qazaqstan Fýtbol federatsııasynyń uıymdastyrýymen, Ońtústik Qazaqstan oblysy ákimdiginiń qoldaýymen qolǵa alynǵan sporttyq is-sharaǵa Albanııa, Ázerbaıjan, Iran, Resseı-2, Qyrǵyzstan, Tájikstan, Krýzeıro-Qazaqstan jáne Qazaqstan fýtbol komandalary qatyspaq. Al oıyndar «Tassaı» shaǵyn aýdanyndaǵy «BIІK» sport kesheninde, kúndelikti saǵat 10:00-17:00 aralyǵynda ótedi.
Halyqaralyq týrnırdiń júlde qory qomaqty. Jarys nátıjesinde 3-oryn alǵan komandaǵa 3 myń AQSh dollary berilse, 2-oryn alǵan komandaǵa 5 myń AQSh dollary buıyratyn bolady. Al týrnırdiń jeńimpazyna 7 myń AQSh dollary daıyn tur. Sondaı-aq, týrnır aıasynda uıymdastyrýshylar alqasy tarapynan «Úzdik tóreshi», «Úzdik qaqpashy», «Úzdik qorǵaýshy», «Úzdik jartylaı qorǵaýshy», «Týrnırdiń Úzdik mergeni» jáne «Úzdik oıynshy» atalymdary da belgilengen.
Aıta keteıik, týrnırdiń aqtyq oıyny 2016 jyldyń 12 tamyz kúni, saǵat 17.00-de Qajymuqan atyndaǵy Ortalyq stadıonda ótedi.
