OQO-da túlkibastyq baǵbandar bıyl 24 myń tonna alma jınady
ASTANA. QazAqparat - Kezinde almanyń aport sortyn ósirip, óńdeýmen aınalysqan Túlkibas aýdanynyń baǵbandary bul isti qaıta qolǵa alyp otyr. Endi olar Túlkibastyń brendi bolatyn alma baý sharýashylyǵyn damytý maqsatyndaǵy jumystardy shıratýda, dep habarlaıdy Ońtústik Qazaqstan oblysy ákimdiginiń baspasóz qyzmeti.
Máselen, aýdanda sońǵy 3 jylda sharýalardyń alma egýge degen qyzyǵýshylyqtary artqan, ıaǵnı, olar bos jatqan 814 ga jerge alma baý egip, memleketten beriletin sýbsıdııaǵa qol jetkizgen. Al, bıyl olar 355 ga jerge alma baý otyrǵyzdy. Onyń ishinde 122 gektary qarqyndy baý.
Túlkibastyq sharýalar kúzgi terim jumystaryn ýaqytyly júrgizip, baý-baqshalardan 24 myń tonnadan astam alma jınady. Jınalǵan almalardyń basym kópshiligi arnaıy qoımalarda saqtalsa, qalǵany elimizdiń ózge aımaqtarynda satylymǵa shyǵarylýda. Ásirese aýdandaǵy eń iri «Kóktal» jáne «Ken-taý» sharýashylyqtary 5970 tonna alma jınaǵan.
Jalpy Túlkibas aýdany taýly aımaqta ornalasqan. Aýa raıy qońyr salqyn, alma-baý jemis aǵashtaryn ósirýge óte qolaıly aımaq bolyp esepteledi. Búgingi tańda aýdandaǵy barlyq jemis aǵashtarynyń kólemi 3115 gektardy qurap otyr. 2020 jylǵa deıin aýdan kóleminde alma baý kólemi 3600 gektarǵa jetkizilip, onyń ishinde aýdanda qarqyndy baýlardy ósirý damytylyp, ónim kólemin ulǵaıtý josparlanýda.
