OQO-da «Týǵan jer» baǵdarlamasy aıasynda 180 balaǵa arnalǵan jańa balabaqsha ashyldy
ShYMKENT. QazAqparat - Ońtústik Qazaqstan oblysy Maqtaral aýdanyndaǵy Jańa aýyl eldi mekeninde 180 balaǵa arnalǵan jańa balabaqsha paıdalanýǵa berildi. "Týǵan jer" baǵdarlamasy aıasynda salynǵan mektepke deıingi mekemeni jergilikti kásipker Bahtııar Qazybaev Elbasynyń bastamasyna qoldaý retinde jáne týǵan jerdi túletý maqsatynda ashyp otyr, dep habarlaıdy QazAqparat tilshisi.
Kásipkerdiń aıtýynsha, balabaqshanyń qurylysyna 124 mln teńge qarjy jumsalǵan. Endi 6 topta tárbıelenetin 180 bala memlekettik tilde bilim alady. Sondaı-aq, aýyldaǵy 24 adam turaqty jumysqa tartylyp otyr.
"Balabaqsha salyp, paıda tabýdy kózdep otyrǵan joqpyn. Elbasy usynǵan "Týǵan jer" baǵdarlamasyn júzege asyrýdy ózime borysh ári qurmet dep sanaımyn. Aýyl balalary jastaıynan boıyna patrıottyq tárbıeni sińirip, erteń elimizdiń órkendeýine úles qosatyn sanaly azamat bolyp qalyptasýyna yqpal etsem deımin" - dedi Bahtııar Qazybaev.
Bilim berý mekemesiniń ashylý saltanatyna Maqtaral aýdanynyń ákimi Ǵalym Ismaılov, oblystyq Qazaqstan halqy Assambleıasy tóraǵasynyń orynbasary Muratáli Qalmuratovtar qatysyp, turǵyndardy jańa balabaqshanyń ashylýymen quttyqtady. Munan soń qonaqtar aýyl turǵyndarymen birge balabaqsha ǵımaratyn aralap kórip, toptardyń jumysymen tanysty. Sondaı-aq, balalardyń ázirlegen kontserttik nómirlerin tamashalady.
Aıta keteıik, zamanaýı úlgide salynǵan balabaqsha ǵımaraty ashana, kontsert zaly sııaqty t.b. bilim berýge qajetti qural-jabdyqtardyń barlyǵymen qamtylǵan.
