OQO-da toıda tóbeles shyǵaryp, adam óltirgender sottaldy
ShYMKENT. QazAqparat - Ońtústik Qazaqstan oblysynda toıda tóbeles shyǵaryp, kúıeý jigittiń joldasyn óltirgen eki aǵaıyndy sottaldy, dep habarlaıdy QazAqparat tilshisi.
Óńirdiń qylmystyq ister jónindegi mamandandyrylǵan aýdanaralyq soty adam ólimine kináli dep tanylǵan Maqtaral aýdanynyń turǵyndaryn 15 jylǵa bas bostandyǵynan aıyrdy.
Qylmystyq oqıǵa 2016 jyldyń jeltoqsan aıynda bolǵan. Maqtaral aýdanynyń 34 jastaǵy turǵyny kóligimen jańadan úılengen joldasyn kelinshegimen alyp júrgen. Jol boıynda onyń kóligin Aýdı men Mersedes kóligin tizgindegender qysyp, júrýine kedergi jasaǵan. Joldaǵy teketires aqyry tóbeleske ulasady. Eki kólikte bolǵan aǵaıyndy jigitter, Maqtaly aýylynyń turǵynyn uryp-soǵyp, tórt jerinen pyshaqtap ketken. Keıinnen osy qylmysqa qatysy bar degen bir kúdikti ustalǵan bolatyn.
Tergeý barysynda seziktiniń aýyr qylmysty baýyry jáne týys aǵasymen birge jasaǵany anyqtaldy. Úsh aıyptalýshyǵa qatysty sot otyrysy ótken jyldyń sáýir aıynda bastalǵan edi. Alaıda sýdıa Ábsattar Shaıhıdınov búgin tek aǵaıyndy eki jigitke ǵana sot úkimin shyǵardy. Qasaqana kisi óltirdi dep aıyptalǵandar 15 jylyn túrmede ótkizetin boldy.
Al, týys aǵalary sot úkimimen aqtalyp, sot zalynan bosatyldy. Dese de mundaı úkim jábirlenýshi tarapty qanaǵattandyrmady. Marqumnyń týystary sot zalynda shý shyǵaryp, aıyptalýshylardyń týystarymen janjaldasyp ketti. Bolmaǵan soń sot zalyna qosymsha tártip saqshylary shaqyryldy. Qalaı bolǵanda da taraptar sot úkimimen keliskisi joq. Olar úkim kúshine enbeı turyp, sotqa narazylyq shaǵym beremiz dep otyr.
