OQO-da tórt kúnde tórt adam sýǵa batyp, ajal qushty
ShYMKENT. QazAqparat - Ońtústik Qazaqstan oblysyndaǵy aptap ystyqta kóńildi demalystyń sońy qaıǵyly jaǵdaımen aıaqtalǵan. Merekege oraı berilgen tórt kúndik demalysta tórt adam sýǵa ketti. Ókinishke oraı, kóz jumǵandardyń ekeýi bala, dep habarlaıdy QazAqparat HAA tilshisi.
Óńirdegi qutqarýshylardyń aıtýynsha, qaıǵyly jaǵdaılar adamdardyń qaýipsizdik erejelerin saqtamaýynan oryn alǵan. Baqılyq bolǵan ekeý ruqsat etilgen sý qoımasynda shomylǵanymen, jaǵadan tym alystap ketken. Saldarynan olar sýǵa batyp ketken.
«Oqıǵalardyń biri Shardara sý qoımasynda oryn aldy. 1963 jylǵy er adam sýdyń shomylýǵa ruqsat etilmegen jerine ótip ketip baqılyq boldy. Týra osyǵan uqsas jaǵdaı Mıhaılovsk sý qoımasynda oryn aldy. 1986 jylǵy kelinshek qaýipsiz aımaqtan shyǵyp ketip, qutqarýshylar jetemin degenshe kóz jumǵan», - deıdi OQO TJD baspasóz hatshysy Zárıpa Turysbekova.
Al, balalarǵa qatysty oqys oqıǵa aýdandarda tirkelgen. Otyrar aýdanynda 2005 jylǵy jetkinshek sýǵa aǵyp ketse, Saryaǵash aýdanynda 2014 jylǵy búldirshin de sýdyń qurbany boldy. Ekeýi de ata-ananyń qaraýynsyz qalyp, sý arnasyna qulap ketken.
Aıta keteıik, bıyl óńirde 17 adam sýǵa ketip ajal qushty. Olardyń 11-i kámelet jasyna tolmaǵan balalar. Qaıǵyly jaǵdaılarǵa negizinen turǵyndardyń salǵyrttyǵy men ata-analardyń balalaryn qaraýsyz qaldyryp ketýi sebep bolǵan.
