OQO-da tazalyq talaptaryn saqtamaǵan kásipkerlerge 177 mln teńge aıyppul salyndy

Ásirese jekelegen medıtsınalyq mekemeler men qonaqúılerde, shashtarazdar men monshalarda  sanıtarlyq tazalyq talapqa saı emes. Bul týraly búgin Oblystyq tutynýshylardyń quqyn qorǵaý departamentiniń mamandary málimdedi, dep habarlaıdy QazAqparat HAA tilshisi.

Kásipkerlerdiń basyn qosyp, dóńgelek ústel ótkizgen mamandar jyl basynan beri osyndaı 4 myńǵa tarta kemshilik anyqtalǵanyn aıtady. Medıtsınalyq mekemelerde arnaıy qural-jabdyqtar zalalsyzdandyrylmaı, qaldyqtar qalaı bolsa solaı tastalyp kelipti. Al, mundaı kemshilikter túrli aýrýlardyń tarap ketý qaýipin týdyratyny belgili. Monshalar men qonaqúılerde de jaǵdaı máz emes. Der kezinde tazalyq sharalary júrgizilmeı, tutynýshylarǵa talapqa saı qyzmet kórsetilmepti. 

«Búgingi kúnge deıin  kásipkerlerge 5467 derek boıynsha 177 mln teńge aıyppul salyndy. Onyń ishinde 1501 jospardan tys tekserý júrgizildi. Olardyń barlyǵy tutynýshylardan shaǵym túsken soń qolǵa alynǵan jumystar. Bizdiń mekemege azamattardan osynda aryz-shaǵymdar kóptep túsýde»,- deıdi Oblystyq Tutynýshylardyń quqyn qorǵaý departamentiniń bólim basshysy Natalıa Babıakına.