OQO-da táýlik boıy jumys isteıtin tis emhanasy ashyldy
ASTANA. QazAqparat - Ońtústik Qazaqstan oblystyq tis emdeý emhanasy halyqqa táýlik boıy qyzmet etýge kóshti. Densaýlyq saqtaý basqarmasynyń basshysy M.Egizbaevtyń buıryǵymen azamattardyń túngi ýaqytta da em qabyldaýy úshin osyndaı qolaıly jaǵdaı jasaldy. Endi táýliktiń kez kelgen ýaqytynda oblys turǵyndary tańnyn atysyn kútpeı-aq dárigerdiń kómegine júgine alady, dep habarlaıdy oblystyq ákimdiktiń baspasóz qyzmeti.
- Bizdiń emhanada 195 adam jumys isteıdi. Onyń 68-i dáriger-stamatolog, 66-sy - medbıke. Búginde oblys ákimi Janseıit Túımebaevtyń tapsyrmasy boıynsha halyqqa táýlik boıy qyzmet etý maqsatynda 4 brıgada - 4 dáriger, 4 medbıke jáne 4 sanıtar túngi mezgilde naýqastardy qabyldaýda. Bul elimizde alǵash qolǵa alynǵan shara. Buǵan deıin bizde jylyna 200 myńǵa jýyq adam tegin em alyp kelgen. Al, kúnine 400-den astam adam em qabyldaıdy. Endi táýlik boıy jumys istegen soń emhanaǵa qaralýǵa keletinderdiń sany budan da artatyny anyq. Basqarma tarapynan barlyq jaǵdaı jasalǵan. Naýqastardy emdeýge, olarǵa kómektesýge tolyq múmkinshiligimiz bar. Tek syrqat adam tańdy kútpeı-aq Shymkent qalasy, T.Aıbergenov kóshesi 5-V ǵımaratynda ornalasqan emhanaǵa kelýi tıis. Bizge jedel járdemmen jetýi mindetti emes, - deıdi oblystyq tis emdeý emhanasynyń bas dárigeri Erǵalı Ormanov.
Aqpan aıy bastalǵaly, munda 7 kúnde túngi mezgilde 24 adam tisterin emdetken. Aýdan-aýyldardan kelgender de bar. Degenmen, olardyń 17-sinde tis syrqatynyń asqyný belgileri anyqtalǵanyn tilge tıek etken Erǵalı Kerimbekuly oblys turǵyndaryn jylyna eki ret medıtsınalyq tekserýlerden ótip turýǵa shaqyrdy.
Shymkent qalalyq medıtsınalyq jedel járdem stantsııasy 2016 jylǵy málimeti boıynsha túngi ýaqytta járdem suraǵan naýqastardyń 277-i pýlpıt aýrýymen syrqattanǵandar, tekserýden keıin 217 naýqas úıinde qaldyrylǵan, 60 naýqas statsıonarǵa alyp kelingen. Karıes dıagnozymen 197 naýqas járdem suraǵan, onyń 186-y úıinde qaldyrylǵan, 11 naýqas statsıonarǵa alyp kelingen. Jaraqatty tis julý dıagnozymen 94 naýqas shaǵymdanǵan, onyń 61 úıinde qaldyrylyp, 33 naýqas statsıonarǵa alyp kelingen. Sonymen qatar Shymkent qalalyq jedel járdem aýrýhanasynyń jaq bet bólimine 487 eresek jáne oblystyq balalar aýrýhanasy jaq-bet hırýrgııasyna 285 bala tis aýrýlarynyń qaýipti asqynýlary abstsess, flegmona dıagnozdarymen emdelýge kelgen. Joǵaryda kórsetilgen málimetterdi zerdeleý barysynda túngi mezgilde járdemge muqtaj bolǵan tis aýrýlarymen aýyrǵan naýqastar tolyqqandy em almaǵan. Tek aýrýbasýshy dárilermen ýaqytsha em alýmen shektelgen. Olarǵa emdi stomatologııalyq mekemelerde jalǵastyrý jaıly keńes berilip kelgen. Alaıda sol naýqastar stomatologııalyq mekemelerge 1-2 kún keshigip kelýde. Keı jaǵdaılarda ata-analarynyń ýaqyttary tapshy bolǵandyqtan balalar 3-4 odan da kóp ýaqyttan keıin stomatologtyń qabyldaýynda bolady. Osyndaı tis aýrýlarynyń asqynýlaryn boldyrmaý jáne aldyn alý úshin keshki, túngi mezgilde stomatologııalyq kómekke muqtaj bolǵan naýqastarǵa tolyqqandy, sapaly, bilikti kómek kórsetý maqsatynda táýlik boıy stomatologııalyq kómek kórsetý nysandaryn uıymdastyrý qajettiligi ózekti máselege aınalyp otyr. Bul bas josparǵa saı aýmaǵy ulǵaıyp, turǵyndarynyń sany artqan, qala qonaqtaryn qosa alǵanda 1 mıllıonnan astam adamǵa táýlik boıy qyzmet kórsetetin tis emhananyń qajettiligin ańǵartady.
Qazaqstan Respýblıkasy Úkimetiniń 2014 jylǵy 27 qańtardaǵy №29 sandy «Tegin medıtsınalyq kómektiń kepildik berilgen kóleminiń tizbesin bekitý týraly» Qazaqstan Respýblıkasy Úkimetiniń 2009 jylǵy 15 jeltoqsandaǵy №2136 qaýlysyna ózgeris engizý týraly» Qaýlysyna saı 14 jasqa deıingi balalar, 18 jasqa deıingi jasóspirimder, júkti áıelder, halyqtyń áleýmettik qorǵalmaǵan toptaryna stomatologııalyq kómek qatty aýrǵan jaǵdaıda (ostraıa bol) tegin kórsetiledi.
