OQO-da táýligine 50 tonna sút óńdeıtin zaýyt iske qosylady
ASTANA. QazAqparat - Ońtústik Qazaqstan oblysy, Ordabasy aýdanynda ornalasqan eń sońǵy úlgidegi qondyrǵylarymen jabdyqtalǵan «Bórte-Mılka» keshendi sút fermasy taıaýda sút óńdeý zaýytyn iske qospaq, dep habarlaıdy Ońtústik Qazaqstan oblysy ákimdiginiń baspasóz qyzmeti.
Táýligine 50 tonna sútti óńdeýge qaýqarly kásiporyn qaımaq pen aıran jáne balalarǵa arnap «Bórte Mılka» ıogýrtynyń 6 túrin shyǵaratyn bolady. Kásipkerdiń aıtýynsha, qazirgi tańda zaýyt iske qosylýǵa tolyqtaı derlik daıyn. Jumysyn bastaǵan kúnnen bastap shaǵyn fermerlerden de sút qabyldaı bastaıdy. Olarmen kelisimshart jasalady.
Kompanııa kesheni óńirdegi jalǵyz robottandyrylǵan sút-taýarly ferma bolyp sanalady. Ferma shvedtiń DeLaval kompanııasynyń eń zamanaýı tehnologııasyn qoldanyp soǵylǵan.
Mundaǵy barlyq jumysty derlik robottar atqarady - sıyrdy tazalap, saýady jáne turatyn ornyn tazalaıdy. Jemdeletin sıyrlardy salqyndatý júıesi, meteostantsııasy bar jeldetkish júıesi, kúndizgideı jaryq júıesi, sıyrdyń toıǵanyn anyqtaý kameralary ornatylǵan.
Investıtsııa kólemi 2,4 mlrd teńgeni quraıdy. Munda Goldshteın Frız tuqymdas 700 sıyr bar. Árqaısysyna biregeı kody bar chıp ornatylǵan. Saýyn sıyr týraly aqparat jalpy kompıýterge túsedi. Ár sıyrdan táýligine 30-40 lıtr sút saýylady. Osylaısha bir táýlikte shamamen 9 tonna sút jınalýda.
Osynaý jumystyń barysymen búgin oblystyq kásipkerlik, ındýstrııaldy-ınnovatsııalyq damý jáne týrızm basqarmasy uıymdastyrǵan press-týr barysynda BAQ ókilderi men blogerler tanysyp kórip qaıtty.
