OQO-da «Táýelsiz elim-Qazaqstanym!» atty turaqtylyqty tý etken erekshe kesh ótti
ASTANA. QazAqparat - Shymkentte beıbit ómir men turaqtylyqtyń, tynyshtyq pen tatýlyqtyń qadirin arttyrýǵa arnalǵan kesh ótti, dep habarlaıdy QazAqparat.
Ony Qazaqstan halqy Assambleıasynyń oblystaǵy ókildigi men «Yntymaq» etnosaralyq mádenı birlestigi uıymdastyrdy.
Merekege jınalǵandar aldymen arnaıy kórmeni tamashalady. Yntymaq pen tatýlyqtyń kórinisin pash etken etnos ókilderi ulttyq taǵamdaryn daıyndap, on saýsaǵynan óner tamǵan sheberlerdiń buıymdaryn kópshiliktiń nazaryna usyndy. El táýelsizdigimen qatar negizi qalanǵan «Yntymaq» etnosaralyq mádenı birlestigi aımaqtaǵy moldavan, lezgın, gagaýz, qarashaı, bolgar, cheh, chývash syndy az etnos ókilderin óz qanatynyń astyna alyp otyr.
Sondaı-aq, olardyń salt-dástúrin saqtaý, mádenı qundylyqtaryn jańǵyrtýǵa jaǵdaı jasaýda. Búgingi merekeni toılaýda barlyq ult ókilderi shet qalmaı, birligi bekem, tirligi túzý el ekenimizdi dáleldeýge tyrysty. Shara barysynda qoǵamdyq kelisimniń nyǵaıýyna súbeli úles qosqan jandar erekshe qurmetke ıe boldy.
Eske sala keteıik, jalpy Ońtústik Qazaqstan oblysynda elimizde bar barlyq etnos ókilderi turady. Olar búgingi tańda jeri qunarly aımaqta adal eńbek etip, jergilikti ultpen tatý-tátti ǵumyr keshýde.
Oblysta olardyń tilderi men salt-dástúrlerin umytpaı únemi ulyqtap otyrýlaryna múmkindikter barynsha jasalǵan. Qazaq eliniń kez-kelgen merekesi men kóptegen eldik sharalaryna belsene atsalysady. Elbasy N.Nazarbaevtyń únemi eldi birlik pen tatýlyqqa shaqyryp, tynyshtyqty saqtaý maqsatynda aıtatyn ataly sózderin jáne eren ıdeıalaryn mundaǵy jurt joǵary baǵalaıdy.
