OQO-da tastaqty jerde júzim ósirile bastady
ShYMKENT. QazAqparat - Ońtústik Qazaqstan oblysy, Tólebı aýdanynda júzim ósirý isi qolǵa alyndy. Jeke kásipker Sabyrjan Tanabaev tastaq jerdi tıimdi paıdalanyp, jańa tehnologııamen 10 gektarǵa júzim ekken. Al bıyl qosymsha 10 gektar jerge 16 myń túp kóshet otyrǵyzdy, dep habarlaıdy QazAqparat HAA tilshisi.
Sharýashylyqqa qarasty 20 gektar jerge jalpy sany 32 myń túp «Taıfı-Rozovyı» ashanalyq júzimi egilgen. Qazirgi tańda túrkııalyq mamandardyń kómegimen beton tireýishter ornatyp, tamshylatyp sýarý júıesin ornatylǵan.
«Júzim egý isin ótken jyldyń sáýir aıynda bastadyq. Eń aldymen tastaq jerdiń alǵashqy qyrtysyn syryp tastap, qunarly topyraq tósep shyqtyq. Munda egilgen kóshetterdi Saryaǵash aýdanynan arnaıy aldyrttyq. Alǵashqy 16 túp kóshettiń 98 paıyzy tamyr alyp, ónip shyqty. Qazirgi júzimniń jaǵdaıy óte jaqsy. Qys boıy jer astyna kómilgendikten búginde jer betine qaıta shyǵaryp, túpterge tireýishter ornatyp jatyrmyz», - deıdi sharýa qojalyǵy dırektorynyń orynbasary Nurǵısa Derbisov. 
Jobanyń jalpy ınvestıtsııalyq quny - 50 mln teńgeni quraıdy. Bul qarjynyń teń jartysyn «Damý» baǵdarlamasy aıasynda «Maksımým» aımaqtyq ınvestıtsııa ortalyǵynan alǵan. Qojalyq basshysy 10 gektar jerdi satyp alsa, 10 gektar jer memleket tarapynan 49 jylǵa jalǵa berilgen.
«Byltyrǵy jyly júzim alqabynyń ár gektaryna memleket tarapynan 750 myń teńgeden sýbsıdııa berildi. Bul bizge úlken kómek boldy. Júzim baǵymyz bıylǵy jyly alǵashqy ónimin bere bastaıdy. Aldaǵy josparymyzǵa sáıkes, gektaryna 35-40 tonnadan ónim alý oıymyzda bar», -deıdi N. Derbisov.
Búginde júzim baqta 20-ǵa tarta adam eńbek etip jatyr. Jalaqylary ortasha eseppen 60 myń teńgeni quraıdy. Al maýsymdyq jıyn-terim mezgilinde munda 60-qa jýyq adam jumysqa tartylatyn bolady.
Aıta keteıik, qojalyq aldaǵy jyldary júzimdi qaıta óńdeý isin qolǵa alyp, júzim baqqa jaqyn mańnan kókónis saqtaý qoımasynyń qurylysyn bastamaq nıette.
