OQO-da tasqyn sýdyń aldyn alý jumystary júrgizilýde
ShYMKENT. QazAqparat - Ońtústik Qazaqstan oblysynda tasqyn sýdyń aldyn alý jumystary júrgizilýde. Óńirdegi aýdan, qala ákimdikteri men Oblystyq tótenshe jaǵdaılar departamenti birlese Saryaǵash jáne Maqtaral aýdandarynda, Syrdarııada qaýiptiń bar-joqtyǵy týraly zertteý jumystaryn atqardy, dep habarlaıdy "QazAqparat" HAA tilshisi.
Al, Shardara aýdanyna qarasty Sútkent eldi mekeniniń 800 metr jerine jáne ózen arnasyna qummen qaptalǵan 7000-ǵa jýyq qap qoıylyp, oǵan 20 tehnıka men 210 adam jumyldyryldy.
Búginde jaǵa bekitý isi Otyrar, Saryaǵash, Shardara aýdandary men Túrkistan, Arys qalalarynda da qarqyn alǵan. Máselen, atalǵan aýdan, qalalardaǵy tıisti mekenderge qummen toltyrylǵan 300 myń dana qapshyq qoıylyp, 467 adam, 60 arnaıy tehnıka jáne 10 júzý quraldary daıyndyqqa keltirildi.
Bul jergilikti atqarýshy organdarymen Syrdarııa ózeniniń arnasyna Ózbekstan Respýblıkasynan sekýndyna jalpy kólemi 1500-den 2000 tekshe metr/sek deıin sý tastalǵanda bolýy múmkin sý tasqyny jaǵdaıyna eseptelgen. Aıta ketý kerek, Tótenshe jaǵdaılar departamentiniń mamandary «Qazgıdromet» RMK ortalyǵynan kúndelikti málimetter alyp, oblys aýmaǵyndaǵy kóktemgi sý tasqyny jaǵdaıyna monıtorıng, boljaý jumystaryn toqtaýsyz atqaryp keledi.
