OQO-da tasqyn sýdan qaýip joq
ShYMKENT. QazAqparat - Ońtústik Qazaqstan oblysynda sý tasqynynan qaýip joq jáne jaǵdaı turaqty baqylaýda. Aımaq basshysy Janseıit Túımebaev osylaı málim etti, dep habarlaıdy QazAqparat tilshisi.
Búgingi tańda aýdan, qalalarda tasqynǵa qarsy shtabtar qurylyp, táýliktik kezekshilikter uıymdastyrylýda. Oblys aýmaǵyndaǵy barlyq sý qoımalary men ózen kólderge kúndelikti monıtorıng júrgizilýde.
Oblys ákiminiń aıtýynsha, óńirdegi sý qoımalarynyń ortasha tolýy 35-60 paıyzdy quraıdy. Qańtar aıynyń sońynda aýa-raıynyń sýyq bolýynyń saldarynan Syrdarııa ózeninde muz qatqan. Qazirgi tańda muz erip, ózen boıynda ornalasqan aýdandarda jaǵdaı baqylaýǵa alynǵan. Ońtústik Qazaqstan oblysy ákimdigi tarapynan «Sý tasqyny qaýpiniń aldyn alý jáne joıý jónindegi 2017-2020 jyldarǵa arnalǵan is-sharalar kesheni» jol kartasyna 98 ınjenerlik sharalar engizilgen.
«Jol kartasyna sáıkes 2017 jyly 247 eldi mekende tótenshe jaǵdaıdyn aldyn alý jáne joıý boıynsha 42 shara uıymdastyryldy. Bul maqsatqa 3,5 mlrd teńge baǵyttalǵan. Badam, Keles, Shaıan ózenderinde arna túzeý, qorǵanys dambalary jáne 2 530 metr jaǵany bekitý men 3,08 shaqyrym bóget turǵyzý jumystary atqaryldy. Sondaı-aq, 352,3 shaqyrymdyq burynnan bar dambalar nyǵaıtylyp, 49 shaqyrym jańa bógetter salyndy. Budan bólek, 52,5 shaqyrym ózen jaǵalaýlary bekitilip, 673,3 shaqyrym aryq-kanaldar, 397 sý ótkizý qubyrlary tazalandy. Jergilikti halyqty habardar etý úshin dabyl berý qondyrǵylary satyp alyndy», - dedi Janseıit Túımebaev.
Ákimniń málimetinshe, óńirde aǵymdaǵy jyly tasqynǵa qarsy 39 is-shara josparlanyp, oǵan jalpy 2,6 mlrd teńge qaralyp otyr. Búgingi tańǵa smetalyq qujattar tolyq daıyndalǵan. Oblystyq bıýdjetten 18,5 mln teńge bólinip, jańadan salynatyn sý qoımalardyń oryndaryna zertteý jumystary júrgizildi. Nátıjesinde sý jınaqtaý kólemi 378,64 mln tekshe metrdi quraıtyn 26 sý qoımasyn salý qarastyrylýda.
Al, respýblıkalyq bıýdjetten sý jınaqtaý kólemi 340,5 tekshe metrlik 3 nysannyń qurylysy júrgiziledi. Nátıjesinde jańadan 9 myń gektar sýarmaly jer aınalymǵa qosylatyn bolady.
Syrdarııa ózeni boıynda ornalasqan Shardara sý qoımasynyń syıymdylyǵy 5,2 mlrd tekshe metrdi quraıdy. Búgingi tańda munda sekýndyna myń tekshe metr sý kelip, jınalǵan sý kólemi 3 mlrd 185 myń tekshe metrge jetken. Onda jınalǵan sý kólemi ótken jyldyń osy kezeńimen salystyrǵanda 1 mlrd 036 mln tekshe metrge az. Sondaı-aq, qazirgi tańda Kóksaraı sý qoımasynda 1 mlrd 739 myń tekshe metr sý jınaldy. Óńirde qar men jaýyn-shashynnyń 40-50 paıyzǵa az túsýine baılanysty tasqynnan aıtarlyqtaı qaýip kútilmeıdi.
