OQO-da tanysynan 4 mln teńge urlaǵan turǵyn sybaılastarymen ustaldy
ShYMKENT. QazAqparat - Ońtústik Qazaqstan oblysynda tanysynan 4 mln teńge urlaǵan turǵyn sybaılastarymen ustaldy. Júk kóliginiń júrgizýshisin aqshasyn alyp ketken 5 kúdiktige qatysty tergeý amaldary júrgizilip, qamaýǵa alyndy, dep habarlaıdy QazAqparat HAA tilshisi Saryaǵash aýdandyq prokýratýrasyna silteme jasap.
Belgili bolǵandaı, buryn tonaý qylmysy úshin sotty bolǵan «B.T.» esimdi Maqataral aýdanynyń turǵyny óziniń aýyldas tanysynyń júk kóligine kómekshi júrgizýshi bolyp jaldanǵan. Keıinnen ekeýi Reseıge júk alyp barypty. Keri qaıtyp kele jatqan jolda ol qolaıly sátti paıdalanyp, kólikti joldan dúkenge temeki alý úshin toqtatqan. Sóıtip, ońaı jolmen tabys tabý maqsatynda, sybaılastaryna habarlasady. Olarǵa qasyndaǵy aýyldasy qomaqty kólemde aqsha ákele jatqanyn ári Saryaǵash aýdanyndaǵy dámhanalardyń birine kirgen kezde kólikti tonaý qajettigin eskertedi. Ózine kúdik týdyrmaý úshin ol urlyqty sybaılastaryna jasatpaq bolǵan. Eki júrgizýshi Ǵanı Muratbaev aýylyndaǵy dámhanalarynyń birine kirgen kezde qylmystyq top músheleri júk kóliginiń terezesin syndyryp kirip, 4.000.000 /tórt mıllıon/ teńgeni jymqyryp, oqıǵa ornynan boı tasalaǵan.
«Atalǵan derek boıynsha Saryaǵash aýdandyq ishki ister basqarmasynyń polıtsııa bólimi Qylmystyq kodekstiń 188-baby 3-bóligi boıynsha (urlyq) is qozǵap, sotqa deıingi tergeý amaldary júrgizildi. Saryaǵash aýdandyq prokýratýrasymen, osy qylmystyq is boıynsha birqatar sotqa deıingi tergep-tekserý jáne jedel izdestirý is-sharalaryn jan-jaqty tolyq, obektıvti túrde júrgizý týraly jazbasha nusqaý berildi. Artynsha kisi tonaǵan 5 kúdikti de qolǵa tústi. Búginde olardyń ózge de qysmystarǵa qatystylyǵy tekserilýde»,-deıdi aýdan prokýrory Nurjan Boranbaev.
