OQO-da taǵy bir úshem dúnıege keldi
ShYMKENT. QazAqparat - Ońtústik Qazaqstan oblysynda taǵy bir úshem dúnıege keldi. Kentaý qalasyna qarasty Qusshy ata aýylynyń turǵyny Fatıma, Zýhra, Hýrsan esimdi sábılerdi ómirge ákeldi, dep habarlaıdy QazAqparat tilshisi.
18 aqpanda dúnıege kelgen úshemderdiń salmaqtary az bolǵandyqtan olar áli kúnge anasymen birge Túrkistan qalalyq balalar aýrýhanasynda em qabyldaýda. Dárigerlerdiń sózinshe, Zýhra men Hýrsannyń qazirgi jaǵdaılary jaqsy. Al salmaǵy bir kelige de jetpeıtin Fatıma dárigerlerdiń baqylaýyna alynǵan. Aptanyń sársenbisinde olarǵa qala ákimdiginen arnaıy mamandar baryp, jaǵdaılaryn bilip qaıtady.
Kúni keshe eki qyz bir uldy ómirge ákelgen Dılfýza Shámshıevany Qarnaq aýyly ákiminiń orynbasary Qaırat Ahmetov arnaıy baryp quttyqtap, Túrkistan qalasy ákiminiń atynan syılyq tabys etti.
Aıta keteıik, 33 jastaǵy ana buǵan deıin 5 balany ómirge ákelgen. Endi ol - 8 perzenttiń anasy. Kópbalaly kelinshektiń joldasy Kentaý transformator zaýytynda jumys isteıdi.
Eske salaıyq, bul óńirde jyl basynan beri týǵan úshinshi úshem bolyp otyr. Statıstıkalyq málimetterge súıensek, oblysta ortasha eseppen jylyna 7-8 úshem dúnıege keledi eken. Bala týý kórsetkishi boıynsha alǵashqy qatarda Túrkistan qalasy, Saryaǵash, Maqtaaral jáne Saıram aýdandary tur.
