OQO-da taǵy bir baldyrǵanda VICh indeti anyqtaldy
ASTANA. 16 sáýir. QazAqparat - Ońtústik Qazaqstan oblysynda AITV (VICh) indetin juqtyrǵan 10 jasar qyz bala anyqtaldy.
Ǵasyr dertiniń úsh satysy bolsa, arnaıy saraptama jetkinshektiń aýrýy asqynyp, ekinshi klınıkalyq satyda ekenin anyqtady. Ata-ana perzentiniń Adamnyń ımmýn tapshylyǵy vırýsyn 2005-2006 jyldary kúngeıdiń aýrýhanalarynda juqtyrǵanyna senimdi. Bul týraly KTK arnasy habarlady.
Tórt balanyń anasy 30 jastaǵy kelinshekke dárigerler ekinshi perzentiniń aǵzasynda AITV ınfektsııasy tabylǵanyn habarlaǵanyna bir aı boldy. Onyń ózi kezdeısoq anyqtalǵan, 10 jasar qyz jyl saıyn balalar demalys úıinde em qabyldaıtyn kórinedi. Biraq osy joly dárigerler jetkinshekten synama qan alǵan.
«Bir apta ótkennen keıin habar keldi, «qyzyńyzdyń qany uıyp qalypty» dedi. Sóıtip qaıtalap kýrorttan qan aldyrtyp, Almatyǵa jiberdi», - deıdi qyzdyń anasy.
Almatynyń sarapshylary qyzdyń qanynda AITV indetiniń baryn rastaǵan. Ári aty jaman aýrý asqynyp, sońǵy satyǵa bir taban qalypty. Alaıda, onyń qashan jáne qaı jaǵdaıda juqqanyn anyqtaý qıyn.
Balanyń anasy perzentiniń qaýipti indetti shamamen 2006 jyly ońtústikte balalardyń jappaı AITV-ǵa shaldyqqan kezinde juqtyrǵanyna senimdi. Óıtkeni dál sol ýaqytta búldirshin Saıramdaǵy aýrýhanada qatarynan eki jyl em qabyldaǵan.
Esterińizge salaıyq, 2005-2006-shy jyldary Ońtústik Qazaqstan oblysynyń aýrýhanalarynda dárigerlerdiń salaqtyǵynan balalar jappaı AITV indetine shaldyqqan bolatyn. Sol kezde óńirdiń Densaýlyq saqtaý basqarmasynyń basshylyǵy men bir top dáriger sottaldy.
Qazir, oblysta atalmysh vırýsty juqtyrǵan 232 bala bar. Sonyń 178-i ǵasyr dertin aýrýhanalarda juqtyrǵanyn oblystyq Densaýlyq saqtaý basqarmasy da moıyndap otyr.
