OQO-da «Tablıǵı jamaǵat» uıymynyń 7 múshesi dinı nasıhat júrgizgeni úshin sottaldy
Saıram aýdandyq sotynyń sýdıasy Saltanat Qabylova bir jarym saǵat kóleminde úkim oqyp, toptyń jetekshisi men onyń kómekshisin 4 jylǵa bas bostandyǵyn aıyryp, olar jazalaryn jalpy tártiptegi kolonııada óteıtin bolady. Buǵan deıin kepil túrindegi bultartpaý sharasymen júrgen aıyptalýshylar sot zalynan qamaýǵa alyndy. Qalǵan bes adamnyń qolyna da búgin kisen salynyp, olar bir jyl merzimge bas bostandyǵynan aıyrý jazasyna kesildi. Jazalaryn qonys kolonııasynda óteıtin boldy. Aıta keteıik, búgin sottalǵan top músheleri 2000 jyldardan beri teris aǵymnyń jeteginde júrgen.
«Top jetekshisi men onyń kómekshisi «Tablıǵı jamaǵat» aǵymyn tereń bilip, oqý úshin Úndistan men Pákistanǵa barǵan. Keıinnen teris aǵymnyń ortalyǵy sanalatyn Bangladesh memleketinde 4 aı kóleminde bilimin shyńdapty. Qala berdi kórshi Qyrǵyzstan elindegi jamaǵat múshelerimen baılanys ornatyp, tájirıbe jınaqtaǵan. Sol jaqtan tıym salynǵan ádebıetter ákelip, Saıram aýdanynda úgit-nasıhat júrgizgen. Qarabulaq, Qarasý aýyldaryndaǵy namazhanalar men meshitterge jınalǵan halyqqa teris aǵymdy ýaǵyzdaǵan. Keıinnen belgili bir top, ıaǵnı jamaǵat quryp, úılerinde de nasıhat júrgizgen»,-dedi sýdıa S.Qabylova.
Ekeýine qatysty Astana qalalyq Saryarqa aýdandyq soty osy qyzmeti úshin tıisti jaza taǵaıyndaǵan. Soǵan qaramastan sottalǵan top jetekshisi men kómekshisi aǵymdaǵy qyzmetterin toqtatpapty. Kerisinshe ózge oblystarǵa shyǵyp, ol jaqtan kelgen jamaǵatty shaqyryp, nasıhat sharalaryn toqtatpaǵan. Sot aldynda jaýap bergen toptyń bes múshesi de «Tablıǵı jamaǵat» uıymynyń qyzmetine elimizde tıym salynǵanyna qaramastan, belsendilik tanytqan. Ýaǵyzdaryn tyńdaýǵa qatysyp, kitaptaryn taratýmen aınalysyp júripti. Biraq ótken jyldyń qarasha aıynda elimizdiń Ulttyq qaýipsizdik komıteti top múshelerin qolǵa túsirdi. Olardyń ústinen Qylmystyq kodekstiń 405-babymen is qozǵalyp, tergeý júrgizildi. Qylmystyq áreketteri tolyǵymen dáleldenip, is jeltoqsan aıynda Saıram aýdandyq sotyna ótken edi.
