OQO-da tabıǵatty qorǵaý zańnamalaryn buzǵan 68 azamat ákimshilik jaýapkershilikke tartyldy
ShYMKENT. QazAqparat - Ońtústik Qazaqstan oblysynda polıtseıler úsh kún boıy arnaıy reıdtik sharalar júrgizip, zańsyz aǵash kesetinder men jer qoınaýyn óz betinshe paıdalanýshylardy ustaǵan.
Tabıǵatty qorǵaý zańnamalaryn buzǵan 68 azamat ákimshilik jaýapkershilikke tartyldy, dep habarlaıdy QazAqparat HAA tilshisi.
Oblystyq Jergilikti polıtsııa basqarmasy qyzmetkerleri óńirlik tabıǵatty qorǵaý ınspektorlarymen jáne basqa da múddeli organ ókilderimen birlese otyryp, «Tabıǵat» jedel aldyn alý sharasyn ótkizdi. Tekserý kezinde jer qoınaýyn óz betinshe paıdalaný, zańsyz balyq aýlaý jáne aǵashtardy kesý derekterine qatysty 13 qylmys tirkeldi. Máselen, Sozaq aýdanynyń tártip saqshylary aýdandaǵy Tasty aýylyna kireberis jolda kúdik týdyrǵan «GAZ 53» júk kóligin toqtatqan. Kólikti qaraý barysynda sekseýil aǵashtarynyń tıelgeni anyqtaldy. Búginde keltirilgen sekseýil shyǵynynyń kólemi tekserilip, avtokólik aqyly aıypturaqqa qoıyldy. Júrgizýshige qatysty «Aǵashtar men butalardy zańsyz kesý, joıý nemese zaqymdaý» babymen qylmystyq is qozǵalyp, sotqa deıingi tergeý júrgizilýde. Sondaı-aq oblys aýmaǵyndaǵy ózenderden tas urlaıtyndardyń da joly kesildi. Quqyq qorǵaý organy ókilderi reıdtik sharalaryn júrgizgen úsh kún ishinde tabıǵatty qorǵaý zańnamalaryn buzǵan 70-ke tarta azamatqa 249 myń teńge kóleminde aıyppul saldy.
