OQO-da sýarmaly jerdiń 186 myń ga alqaby sortańdanyp ketken
ShYMKENT. QazAqparat - Óńirde aýyl sharýashylyǵy jerleriniń tuzdaný máselesi kún tártibinen túsken emes. Osyǵan oraı, oblys ákimi B.Atamqulovtyń bastamasymen kezekti májilis ótkizildi. Jıynǵa QR aýyl sharýashylyǵy akademııasynyń ǵalymdary men doktorlary jáne professorlary qatysty, dep habarlaıdy oblys ákiminiń baspasóz qyzmeti.
Jalpy Ońtústik óńiri respýblıkadaǵy birden bir agrarlyq aımaq. Osylaı degen oblys basshysy jerdiń tuzdaný máselesin sheshýdi tezdetý kerektigin atap ótti. Sebebi aýylsharýashylyǵynyń bolashaǵy jerdiń sapasy men qunarlyǵyna tikeleı baılanysty.
Búgingi tańda, barlyq 566,3 myń ga sýarmaly jerdiń 186 myń ga tuzdanǵan, onyń ishinde 93,6%-yn Maqtaral, Shardara, Otyrar aýdandary men Arys qalasynyń jerleri.
Májilis barysynda Otyrar, Maqtaral aýdandyrynyń jáne Arys qalasynyń ákimderiniń, «Qazsýshar» jáne «Ońtústik Qazaqstan gıdrogeologııalyq-melıoratıvtik ekspedıtsııasy» Respýblıkalyq memlekettik kásiporyndary ókilderiniń atqarylǵan jumystarynyń esepteri men usynystary tyńdaldy.
Aǵymdaǵy jyly 531 shaqyrymdyq 46 sý nysandaryna oblystyq bıýdjetten 3,9 mlrd teńge qarjy qaralyp, jóndeý jumystary júrgizilýde. Atalǵan jumystar aıaqtalǵan jaǵdaıda, 30 myń ga sýarmaly jerdiń jaǵdaıy jaqsaryp, 1,5 myń ga sýarmaly jer jańadan aınalymǵa qosylady.
Aýyl sharýashylyǵy mınıstirligi Islam damý bankimen jer asty sýalarynyń deńgeıin tómendetýge baǵyttalǵan jobalardy qolǵa aldy. Atalǵan jumystar nátıjesinde Maktaral aýdanynda 210 dana, Shardara aýdanynda 302 dana tik drenajdy uńǵymalar qaıta qurylmaq. Nátıjesinde Maqtaral aýdanynda 37 059 ga jáne Shardara aýdanynda 64 315 ga sýarmaly jerdiń melıoratıvtik jaǵdaıy jaqsarady.
Otyrar aýdanyndaǵy Sháýildir alqabyndaǵy ishki kollektorlyq drenaj júıelerdi qaıta qurý jobasy Evropa qaıta qurý jáne damý Banki arqyly qarjylandyrý baǵytynda jumystar júrgizilýde. Osy joba, 12,0 myń ga sýarmaly jerdiń melıoratıvtik jaǵdaıyn jaqsartýǵa qol jetkiziledi.
Odan bólek, Otyrar aýdanynyń sýarmaly jerdiń sýmen qamtamasyz etilýin jáne 5 myń ga jańadan sýarmaly jer qosý maqsatynda, búgingi kúni Evropa qaıta qurý jáne damý bankimen 4,4 mlrd teńgege «Syrdarııa-Arys» kanalyn qaıta qurý jumystarynyń máselesi pysyqtaldy.
Sondaı-aq, Dúnıe júzilik damý bankiniń qarjylandyrýymen IDJJ-2 baǵdarlamasy arqyly Maqtaral aýdanynda 39 757 ga, Shardara aýdanyndaǵy 20 630 ga jáne Túrkistan qalasynda 10 000 ga jerge sýarý júıeleriniń qaıta jańartý jáne qaıta qurý boıynsha júıeli jumystar júrgizý josparlanýda. Qazirgi tańda, Avstralııalyq «SMEG» fırmasy atalǵan baǵdarlamaǵa jobalaý jumystaryn júrgizýde.
Joǵaryda atalǵan jobalardyń aıaqtalýymen 2018-2020 j oblysta sýarmaly jerlerdiń tuzdaný máselesi tolyǵymen sheshimin tabý josparlanýda.
Sonymen qatar, 2016-2020 jyldarǵa arnalǵan «Qazaqstannyń sý resýrstaryn basqarý» memlekettik baǵdarlamasy aıasynda 125 myń ga jańadan sýarmaly jerler qosylý kózdelýde.
Májilis qorytyndysy boıynsha oblys ákimi aýdan, qala ákimderine tapsyrmalar tapsyrdy: 1) ár aýdan boıynsha tuzdalǵan jerlerdiń elektrondy kartasyn qysqa merzimde ázirleý; 2) ǵalymdardy, aýmaqtyq jáne jergilikti atqarýshy organdardy tarta otyryp, tozǵan jerlerdi qalpyna keltirýge júıeli shara qabyldaý; 3) sýarmaly jerlerdiń jaǵdaıyn jaqsartý boıynsha sharýa qojalyqtarymen turaqty túrde jumys jasaý; 4) alǵa qoıǵan tapsyrmalardy iske asyrý úshin oblys ákimi janynda sarapshy keńes qurý.
