OQO-da sý tasqyny jaǵdaıy turaqtandy, basqa eldi mekenderdi sý basý qaýpi joq - QR TJM
ASTANA. 3 naýryz. QazAqparat - QR Tótenshe jaǵdaılar mınıstrliginiń aqparatyna sáıkes, Ońtústik Qazaqstan oblysynda qutqarý jumystary jalǵasyp jatyr.
Ordabasy aýdanyndaǵy №28237 áskerı bóliminiń eki qutqarý batalonymen Kókaral aýylynan bes shaqyrym jerde 1 naýryzdyń túninde uzyndyǵy 500 metr qorǵanys bógetiniń qurylysy júrgizilip, eki myń bóget qapshyqtary úıildi.
Temirlan eldi mekeninde 2 naýryzda úzdiksiz aǵatyn aryqtardaǵy sý deńgeıine monotorıng júrgizilip, bógetterdi nyǵaıtý jumystary atqaryldy.
Qyzylorda, Jambyl, oblystary men Almatynyń Tótenshe jaǵdaılar departamentiniń órt sóndirý jáne apattyq qutqarý qyzmetteri Temirlanda 2 naýryz boıy 6 myń tekshe metr erigen qar sýyn aǵyzý sharalaryn iske asyrdy.
Sonymen qatar osy kúni oblys ákimi men QR TJM jedel toby Shymkent, Túrkistan, Arys qalalary men Ordabasy, Báıdibek aýdandaryn jáne ózenderdegi qalyptasqan ahýaldy baǵalaý úshin óńirlerdi tikushaqpen baıqap qaıtty.
Atap aıtqanda, OQO-da sý tasqyny jaǵdaıy turaqtanyp, qazirgi kezde basqa eldi mekenderdi sý basýdyń qaýpi joq.
Mınıstrliktiń 764 adam men 156 tehnıkasynan quralǵan qutqarý bólimderi tótenshe jaǵdaılar týyndaýy múmkin aýdanǵa jedel jetý úshin joǵary daıyndyq rejıminde tur.
TJM-nyń bólimshileri OQO-daǵy sý tasqyny kezeńi bastalǵannan beri aýdan ákimdikterimen birlese 3 305 adamdy kóshirdi. Uzyndyǵy 1820 metrden astam bógetter turǵyzylyp, sýdan qorǵaý úshin topyraq salynǵan 32 myńnan astam qapshyqtar úıildi. Sý basqan úılerdiń aýmaǵynan 102 myń tekshe metr sý aǵyzyldy.
