OQO-da sý basqan jerlerde táýlik boıyna apattyq-qutqarý jumystary júrgizilýde
ShYMKENT. QazAqparat - Ońtústik Qazaqstan oblysynda sý basqan jerlerde táýlik boıyna sý sorý jumystary júrgizilýde. Maqtaral aýdanynda jaýyn men jer asty sýlarynyń kóterilýi saldarynan aýlasyn sý alyp ketken úılerdiń sany 58-ge jetken. Qazir bul eldi mekenderde apattyq-qutqarý sharalary atqarylýda, - dep habarlaıdy QazAqparat HAA tilshisi.
Búginde Maqtaral aýdany ákimdigi tarapynan tótenshe jaǵdaılardyń aldyn alý boıynsha arnaıy shtab qurylyp, táýlik boıyna úzdiksiz jumystar júrgizilýde. Motopompalarmen kólemi 12 926 tekshe metr bolatyn sý shyǵaryldy. Búgingi tańda sýdyń deńgeıi tómendetilip, tazartylýda.
Oblys ákiminiń orynbasary J.Bókenbaevtyń aıtýynsha, Maqtaaral aýdanyndaǵy sý shyǵarý jumystaryna jalpy 52 adam, 5 tehnıka, 9 motopompa jumyldyrylǵan. Sonymen qatar, aýdan ákimshiligi men jergilikti polıtsııa qyzmetkerlerinen quralǵan 26 adam jumyldyryldy. Osy jumystardy uıymdastyrýda jergilikti turǵyndar da óz úlesterin qosýda.
Shendilerdiń sózinshe búgingi tańda atalǵan aýdanda sý tasqyny qaýpi joq, jaǵdaı turaqty. Jumystar jalǵasýda. Ári másele oblys ákiminiń tikeleı baqylaýyna alynǵan. Sondaı-aq osyndaı qaýip Shymkent, Túrkistan, Arys, Kentaý qalalary men Maqtaral, Saryaǵash, Saıram, Báıdibek, Ordabasy, Shardara, Qazyǵurt aýdandaryndaǵy eldi mekenderde týyndaǵan bolatyn. Bul jerlerde de sý basqan oryndarda apattyq-qutqarý jumystaryn júrgizip, motopompamen sýlardy shyǵarǵan. Jergilikti atqarýshy organdarmen júıeli túrde atqarylǵan jumystardyń nátıjesinde jalpy jaǵdaı ońtaılandy.
Eske salaıyq, óńirde 16-19 aqpan kúnderi jaýǵan nóserli jaýynnyń saldarynan Maqtaaral aýdany turǵyndarynyń úı aýlalaryn sý basyp, turǵyndar úılerinen shyǵa almaı qalǵan bolatyn. Jınalǵan sý tipti keıbir baspanalardyń ishine kirip ketken edi.
