OQO-da sportshy jastar oqýshylarmen birge salaýatty ómir saltyn talqylady
ShYMKENT. QazAqparat - OQO-nyń Saryaǵash aýdanynda «Sportshy jastar dinı ekstremızmge jáne sýıtsıdke qarsy» atty uranymen S.Erýbaev atyndaǵy jalpy orta mektebinde mańyzdy is-shara ótti, dep habarlaıdy aýdan ákimdiginiń baspasóz qyzmeti. Іs-sharada mektep jastary aýdanymyzdyń atyn shartarapqa tanytyp júrgen dańqty sportshylarmen jáne BJSM toptaryndaǵy jas sportshylarmen kezdese otyryp, erkin taqyrypta pikir almasty.
Oqýshylarmen júzdesýge qol kúresi sportynyń álem jáne Azııa chempıondary, voleıboldan Ońtústik Qazaqstan Oblysynyń chempıony qatysty. Atap aıtqanda qol kúresinen álem chempıony, álem kýbogynyń ıegeri, Azııa chempıony Talǵat Aqtaev, álem jáne Azııa chempıony Erdáýlet Nurmahan, Ońtústik Qazaqstan oblysynyń chempıony Asqar Qulymbetov esimdi sportshylarmen ótken júzdesýde salaýatty ómir salty, sporttyń adam ómirinde alatyn orny men mańyzy jóninde áńgime órbidi.
Kezdesý barysynda mekteptiń jas jas sportshylary Álıhan Ulbala, Ábithan Arýjan, Bazarbaı Marjan, Ermek Aıgerim, Ryskeldi Beknur esimdi oqýshylar chempıon aǵalaryna suraqtaryn qoıyp, ár túrli taqyrypta oı bólisti. Álem chempıondary jas sportshylardy salaýatty ómir saltyn ustanýǵa shaqyryp, teris aǵymdarǵa, basqa dinı sektalardyń arbaýlaryna túspeýlerine aqyl-keńesterin berdi. Sondaı-aq, jastardyń bolmashy sebep úshin óz-ózine qol jumsaý sııaqty keleńsiz jaǵdaılardy boldyrmaý úshin oı-órisi bıik, sportty jandaryna serik etken azamat bolyp qalyptasýlary kerek ekendikterine toqtaldy. Sportshylarmen kezdesý óte qyzyqty ótip, mektep jastary chempıon aǵalarymen birge estelik sýretterge tústi.
