OQO-da sottalǵandar nesıe ala alady
ShYMKENT. QazAqparat - Ońtústik Qazaqstan oblysy prokýrorynyń orynbasary Ábil Qojahmetovtyń tóraǵalyq etýimen Saıram aýdanyndaǵy probatsııa qyzmetiniń baqylaýynda turǵan sottalǵandarǵa áleýmettik jáne quqyqtyq kómek kórsetý maqsatynda kezdesý ótkizildi, dep habarlaıdy QazAqparat HAA tilshisi.
Aýdannyń densaýlyq saqtaý, kásipkerlik salalary men kóshi-qon jónindegi ýákiletti memlekettik organdar qyzmetkerleriniń qatysýymen ótken basqosýda jazasyn ótep jatqandardy jumyspen qamtý máselesi talqylandy.
Kezdesý barysynda sottalǵandardan áleýmettik jáne ózge de máseleler jóninde saýaldar qoıyldy. Onyń ishinde kásipkerlik qyzmetin júzege asyrýǵa jeńildetilgen nesıe alý, jumysqa ornalasý, jeke basyn anyqtaıtyn qujattardy qalpyna keltirý jaıy sóz boldy. Máselen, probatsııa esebinde turatyn D esimdi azamat mal bordaqylaýǵa jeńildetilgen aýylsharýashylyǵy nesıesin alýǵa kómek berý týraly ótinish jasady. Jıynda bul ótinish boıynsha Saıram aýdandyq kásipkerlik jáne aýyl sharýashylyǵy bóliminiń mamandary sottalǵan turǵynnyń 4 mln teńge kóleminde nesıe alýǵa ótinimin qabyldaýǵa sheshim shyǵardy. Budan bólek, sottalǵandar K. jáne N esimdi azamattar kásipkerlik bólimi arqyly kásiptik daıarlaý kýrstaryna jiberilip, ony aıaqtaǵannan keıin jumysqa qabyldanatyndary belgili boldy.
Basqosýda prokýratýra sottalǵandardyń quqyqtaryn túsindire kele, ýákiletti memlekettik organdarǵa isti bolǵandardyń jumysqa ornalasýy jáne jeke basyn anyqtaý qujattaryn qalpyna keltirý máseleleri boıynsha yqpal jasaýǵa tıisti usynystar berdi.
