OQO-da sot oryndaýshylary alımentti qate eseptegeni anyqtaldy
ShYMKENT. QazAqparat - Ońtústik Qazaqstanda sot oryndaýshylary alıment esepteýde zańbuzýshylyqtarǵa jol bergen. Jeke sot oryndaýshylardyń jumystaryna tekserý júrgizgen Saıram aýdanynyń prokýrorlary kóptegen kemshilikterdi anyqtady, dep habarlaıdy QazAqparat HAA tilshisi.
Belgili bolǵandaı jeke sot oryndaýshylary boryshkerlerdiń bereshekterin esepteý kezinde ǵalamtor jelisindegi resmı emes málimetterge súıengen. Al, zań boıynsha boryshker jumyssyz bolǵan jaǵdaıda ortasha jalaqyny resmı túrde ýákiletti organnyń málimetterimen esepteý qajet edi.
Máselen, jeke sot oryndaýshy S. Súleımenov boryshkerlerdiń ortasha aılyq jalaqysy 122 422 teńge dep alyp, alımenttiń bereshek mólsherin 30 605 teńge dep eseptegen. Sóıtip úsh aıǵa 91 815 teńge kóleminde tóleýdi mindettepti. Al, elimizdiń «Ulttyq ekonomıka mınıstriligi Statıstıka komıtetiniń saıtynyń málimetine sáıkes, Respýblıka aýmaǵynda bir qyzmetkerdiń ortasha toqsandyq jalaqysy bul kezeńde 154 632 teńgeni quraǵan. Maǵynalas zańbuzýshylyqtarǵa taǵy 8 sot oryndaýshy jol bergeni anyqtaldy. Osyǵan oraı Saıram aýdandyq prokýratýrasy narazylyq keltirip, jeke sot oryndaýshylarynyń tártiptik jaýapkershiligin qarastyratyn bolady.
