OQO-da sıyrdy robot saýatyn jańa kásiporyn táýligine 8 tonna sút óndiredi
Atalǵan ferma Shvetsııanyӊ "DeLaval" kompanııasynyӊ ozyq tehnologııasyn paıdalana otyryp salynǵan, dep habarlaıdy OQO ákiminiń baspasóz qyzmeti.
Óӊirde balamasy joq bul kásiporyn respýblıka boıynsha eӊ zamanaýı sút-taýarlyq fermalarynyӊ alǵashqy úshtigine kiredi.
Kompanııa kesheni tolyǵymen robottandyrylǵan. Keshende búginde 408 bas saýyn sıyr bar. Úsh mezgil saýylatyn bir iri qaranyń táýliktik ortasha ónimdiligi 30-32 lıtrge para-par.
Sút-taýarlyq fermasynda 6 robot-saýynshy, avtomattandyrylǵan kóӊ alǵysh qural-jabdyq, jemdeý ústeli, salqyndatý, meteostantsııaly jeldetkish, sıyrlardyӊ kúıliligin anyqtaý kameralary, sút saýý apparattary bar sút qubyry ornalasqan. Negizgi 400 basqa eseptelgen keshenniń ınvestıtsııalyq kólemi 9,4 mlrd. teńgeni quraıdy. Bul keshen oblysta sút óndirisin jaӊa deӊgeıge kóterýge jáne ımporttyq ónimge táýeldilikti tómendetýge múmkindik beredi.
Sondaı-aq, munda 6 mal dárigeri, 2 tuıaqshy, 2 uryqtandyrýshy jumys isteıdi. Sıyrlardyń qulaǵynda chıp ornatylǵan. Saýyn ornyna osy chıp arqyly kirip shyǵady.
Aıta keteıik, oblysqa jylyna 738,4 myń tonna sút jáne sút ónimderi qajet dep eseptelinedi. Qazirgi kúni naqty óndiriletini - 740,6 myń tonna. Oblys boıynsha iri, orta jáne shaǵyn sút óndirýshi 61 agroqurylym jumys istep jatyr.
Jańa tehnologııamen jabdyqtalǵan jalǵyz sút-taýarlyq fermasynyń jumysymen aýyl sharýashylyǵy kooperatıvterin qurý boıynsha ótken kóshpeli semınarǵa qatysýshylar tanysty.
Semınar keńeste óńirdegi sút pen qus sharýashylyǵynda birlesken kooperatıvter quryp, ónim kólemin arttyrý jaıy talqylandy. Onda oblystyq aýyl sharýashylyǵy basqarmasynyń mamandary kooperatıvterdi qurýdyń talaptary men artyqshylyqtary jaıynda paıdaly maǵlumattar usyndy. Al qarjy uıymdarynyń ókilderi aýyl sharýashylyǵyn qoldaýǵa arnalǵan memlekettik baǵdarlamalar jaıly aıtyp, sýbsıdııa men nesıe alýdyń tártibin túsindirdi.
Semınar-keńeske qatysýshylar sonymen qatar, búginde ónimin alys-jaqyn shetelge eksporttap jatqan «Ordabasy qus» kásipornynyń jumysymen tanysty. Kásporyn jylyna 8110 tonna tiri salmaqta kúrketaýyq etin óndirýge qaýqarly.
