OQO-da sırek kezdesetin dertke shaldyqqan balalarǵa óńiraralyq ońaltý ortalyǵy ashylady
ShYMKENT. QazAqparat - Ońtústik Qazaqstan oblysynda sırek kezdesetin mýkovıstsıdoz dertinen zardap shegetin balalarǵa reabılıtatsııalyq kómek kórsetetin óńiraralyq ońaltý ortalyǵyn ashý josparlanyp otyr. Bul týraly búgin Oblystyq densaýlyq saqtaý basqarmasynda ótken elimizdegi balalarda sırek kezdesetin aýrýlardyń dıagnostıkasy men ony emdeýdiń jańa standarttaryn engizý máselesi talqylanǵan jıynda aıtyldy, dep habarlaıdy QazAqparat tilshisi.
Basqosýǵa Almaty qalasyndaǵy «Pedıatrııa jáne balalar hırýrgııa ortalyǵy» men úkimettik emes uıymdar, «HELP TODAY qoǵamdyq qory», «Mýkovıstsıdozben aýyratyn múgedek balalar» qoǵamdyq birlestigi jáne «Asyl bala» qoǵamdyq qorymen birlestikteriniń ókilderi qatysty. Jıynnyń barysynda sırek kezdesetin (orfandy) aýrýlarmen aýyratyn balalarǵa medıtsınalyq kómek kórsetý sapasyn jaqsartý jáne ońaltý máseleleri sóz boldy.
Aıta keteıik, Ońtústik Qazaqstan oblysynda qazirgi tańda 146 bala mýkovıstsıdoz, mýkopolısaharıdoz, Goshe aýrýy, Drave sındromy, gemofılııa, býllezdi epıdermolız, jetilmegen osteogenez jáne jasóspirimder artrıti sekildi aýrý túrlerimen aýyrady. Mundaı naýqastar BMSK uıymdarynda, sondaı-aq Oblystyq densaýlyq saqtaý basqarmasynyń beıindi shtattan tys bas mamandarynyń dıspanserlik esebinde turady.
Sondaı-aq olarǵa arnalǵan aýrýhanalar men oblystyq ońaltý ortalyqtarynda turaqty túrde emdeledi. Respýblıkalyq jáne jergilikti bıýdjetten bólinetin kerekti dári-dármektermen tolyq qamtamasyz etiledi. Jyl saıyn atalǵan balalar respýblıkalyq deńgeıde Almaty qalasyndaǵy pedıatrııa jáne balalar hırýrgııa ortalyǵy men Astana qalasyndaǵy «Ana men bala ulttyq ǵylymı ortalyǵynda» em qabyldaıdy. Dıagnostıkalyq tekserýlerden ótedi. Usynystar negizinde aımaqtyq deńgeıde em júrgizilip, qajet bolǵan jaǵdaıda respýblıkalyq jáne jergilikti bıýdjetke dári-dármekpen qamtamasyz etý ótinimi joldanady.
