OQO-da ShymkentBuild-2018 halyqaralyq kórmesi ashyldy
ASTANA. QazAqparat - Shymkent qalasynda «ShymkentBuild-2018» atty qurylys jáne ınterer kórmesi bastaldy, dep habarlaıdy QazAqparat Ońtústik Qazaqstan oblysynyń ákimdigine silteme jasap.
Úsh kúnge josparlanǵan sharanyń maqsaty - qurylys sektorynda ozyq tehnologııalardy jetildirip, otandyq jáne sheteldik kásiporyndardyń jetistikterin kórsetý. Sondaı-aq memlekettik organdar men qarjy ınstıtýttarynyń, ǵylym men bıznestiń arasynda baılanys ornatý bolyp tabylady.
Kórmege Qazaqstan, Ózbekstan jáne Reseı elderiniń 30-ǵa jýyq kásipornynyń qurylys, árleý materıaldary men jabdyǵy, lak-syr ónimderi, qurylys tehnıkasy, ǵımarattardy avtomattandyrý qurylǵylary men jylytý, sýmen qamtý jybdyqtary qoıyldy.
Kórmeni aralap tanysqan oblys ákimi Janseıit Túımebaev qatysýshylarǵa alǵysyn bildirip, sharanyń mańyzdylyǵyna toqtaldy.
Óńir basshysy jýyrda ǵana Elbasymyz bes áleýmettik bastamany naqtylap bergenin aıtyp, osyǵan oraı aǵymdaǵy jyly Ońtústik Qazaqstan oblysynda turǵyn úı salý qarqyny kúsheıe túsetindigin jetkizdi. Bul rette búgingi uıymdastyrylyp otyrǵan ShymkentBuild-2018 kórmesi óńirdegi qurylys ındýstrııasynyń damýyna mańyzdy úles qosary sózsiz. Oblys ákimi qazirgi ýaqytta aımaqtyń qurylys ındýstrııasy belsendi túrde damyp keletindigin aıtty.
Aıta keteıik, Ońtústik Qazaqstan oblysynda aldaǵy besjyldyqta 2016-2020 jyldarǵa arnalǵan damý baǵdarlamasy aıasynda 4,8 mln sharshy metr turǵyn úı salý josparlanýda. Búgingi tańda óńirde «Nurly jer» memlekettik baǵdarlamasy boıynsha 2021 jylǵa deıin 1 mln sharshy metr turǵyn úıdi el ıgiligine berý úrdisi qalyptasty. Budan bólek, Shymkent qalasyn Qazaqstannyń úshinshi megapolısi retinde damytý maqsatynda «ShymkentCity» jobasy júzege asyrylýda.
ShymkentBuild-2018 kórmesi aıasynda «Qurylys salasyna jańa tehnologııalardy engizý» taqyrybynda konferentsııa uıymdastyrylady dep kútilýde. Atalǵan shara barysynda kórme qatysýshylary qurylys sektoryndaǵy eń ózekti máselelerdi ózara talqyǵa salatyn bolady.
