OQO-da Shymkent aglomeratsııasyn damytýǵa basymdyq beriletin bolady
ShYMKENT. QazAqparat - Ońtústik Qazaqstan oblysynda jalpy aýmaǵy 1 573,5 myń gektardy quraıtyn Shymkent aglomeratsııasyn damytýǵa basymdyq beriletin bolady. Bul týraly búgin óńirlik kommýnıkatsııalar qyzmetinde ótken brıfıngte oblystyq sáýlet jáne qala qurylysy basqarma basshysynyń orynbasary Baqtybaı Dúısebekov málim etti, dep habarlaıdy QazAqparat tilshisi.
Baqtybaı Dúısebekovtyń sózinshe, negizgi maqsat - qala aýmaǵyndaǵy eldi mekenderdiń áleýmettik, ekonomıkalyq, ınfraqurylymdyq máseleleri sheshý bolyp otyr. Aglomeratsııa - ekonomıkalyq, mádenı jáne turmystyq jaǵynan bir-birimen tyǵyz baılanysty eldi mekenderdiń shaǵyn aýmaqqa shoǵyrlanady.
«Shymkent aglomeratsııasyna 9 qala, aýdan aýmaqtary kiredi. Boljamǵa sáıkes, 2020 jylǵa qaraı aglomeratsııasynyń halqy 10,3 paıyzǵa artady dep kútilýde. Al, 2030 jyly aglomeratsııa halqynyń sany bazalyq kezeńge qaraǵanda 29,7 paıyzǵa kóbeıedi», - dedi Baqtybaı Elikuly.
Sonymen qatar, Shymkent aglomeratsııasy aýmaǵynda 2020 jyldyń sońyna qaraı mektepke deıingi uıymdardy 35 paıyzǵa, al bilim beretin mektepterdiń sanyn 17 paıyzǵa ulǵaıtý josparlanǵan. Budan bólek, statsıonarlyq kómek kórsetetin uıymdardyń sany 2020 jylǵa qaraı 11 paıyzǵa kóbeıetin bolady. Sondaı-aq «Nurly jer» baǵdarlamasyna sáıkes, jaldamaly turǵyn úı qurylysynyń kólemi de artpaq.
Ázirlengen jobaǵa sáıkes, halyqtyń kóshi-qon aǵynyn ustap qalý úshin «kontrmagnıtter» dep atalatyn iri eldi mekender damytylady. Ol úshin ońtústik baǵytta Saryaǵash, al batys baǵytynda Arys qalasy, sondaı-aq shyǵys baǵytynda Turar Rysqulov aýyly tańdalyp alynǵan. Halyqtyń ishki kóshi-qon ortalyqtaryn damytý maqsatynda seriktes eldi mekender retinde Leńgir qalasy, Aqsý, Qazyǵurt, Badam, Temirlan, Tórtkúl, Shaıan eldi mekenderi belgilenip otyr.
Aıta keteıik, jobada aglomeratsııa aýmaǵynda ómir súrýdiń qolaıly jaǵdaılaryn qamtamasyz etýge baǵyttalǵan ınjenerlik, kóliktik, áleýmettik, rekreatsııalyq ınfraqurylymdarynyń keshendi damytý sharalary qarastyrylǵan.
