OQO-da shegirtkelerdi hımııalyq ýlaý jumastary bastaldy
ShYMKENT. QazAqparat - Ońtústik Qazaqstan oblysynda úıirli shegirtke tektes zııankesterge qarsy hımııalyq kúres sharalary bastaldy. Bul týraly Saryǵash aýdanynda aımaq basshysy Janseıit Túımebaevtyń tóraǵalyǵymen ótken semınar keńeste Oblystyq aýmaqtyq ınspektsııa basshysy Nurjan Kashkenov málim etti, dep habarlaıdy QazAqparat tilshisi.
Inspektsııa basshysynyń sózinshe, bıyl zııankestermen kúres jumystary óńirdegi 350 myń gektar alqapta júrgiziletin bolady. Onyń 60 paıyzy jerústi agregattarymen, 40 paıyzy avıatsııamen óńdeledi. Al, hımııalyq kúres sharalary byltyrǵydan 1,3 esege azaıǵan. Onyń ishinde marokko shegirtkesine qarsy kúres sharalary 341 myń gektarda, azııalyq shegirtkege qarsy 4,3 myń gektarda, ıtalıandyq prýs shegirtkesine qarsy 4,7 myń gektarda júrgiziledi.
«Bıyl marokko shegirtkesine qarsy kúres sharalaryna 91 dana jerústi búrikkishteri jumyldyrylmaq. Olar 184,4 myń gektardy zalalsyzdandyratyn bolady. Sondaı-aq, alty AN-2 ushaqtarynyń kómegimen 137,6 myń gektarda hımııalyq óńdeý jumystarynyń júrgizilýi josparlanýda. Oblystyq aýmaqtyq ınspektsııa tarapynan óńdeý jumystarynyń sapaly júrgizilýin baqylaýǵa, uıymdastyrý jumystaryn júrgizýge aýdandar boıynsha 50 ınspektor jáne 19 avtokólik bólinedi», - dedi Nurjan Kashkenov.
Aıta keteıik, 350 myń gektarǵa hımııalyq óńdeý jumystaryn júrgizý úshin 1121 myń gektar alqapta anyqtaý-zertteý jumystaryn júrgizý josparlanǵan. Oǵan «Respýblıkalyq fıtosanıtarlyq dıagnostıka jáne boljamdaý ádistemelik ortalyǵy» memlekettik mekemesiniń oblystyq fılıaly tarapynan shtat boıynsha 128 anyqtaýshy jáne 83 qyzmettik avtokólik bólingen. Buǵan qosymsha 3 aıǵa ýaqytsha jumysqa 278 adam tartylyp, 406 adam anyqtaýshy zertteý jumystaryna jumyldyrylmaq.
Semınar barysynda oblys ákimi úıirli shegirtkege qarsy kúres sharalaryna daıyndyqpen tanysyp, aýdan ákimderine arnaıy shtab jumysyn jandandyrý qajettigin eskertti.
«Bıylǵy jyly shegirtkege qarsy kúres jumystary barynsha tyńǵylyqty atqarylý kerek. Ol úshin zııankesterdiń qanaty qataımaı jatyp, kózin joımasa, boı bermeı ketýi ábden múmkin. Sondyqtan arnaıy qurylǵan shtab jumysyn jandandyryp, aýdan, qala ákimderi tıisti mamandardy bólip, aýmaqtyq ınspektsııamen qoıan-qoltyq jumys isteýi tıis. Sonda ǵana egistik alqaptarymyzdy zııankesterden saqtap qala alatyn bolamyz», - dedi Janseıit Qanseıituly.
Búginde aýdan, qalalarda 11 shtab qurylyp, 43 sý tasıtyn tehnıka men pestıtsıdterdi eritýge qajetti 91 sý kózderi jáne 12 pestıtsıdterdi ýaqytsha saqtaý qoımalary daıyndalǵan. Budan bólek, 15 aerodrom orny belgilendi.
