OQO-da sharýalarǵa sýbsıdııa alýdyń sharttary túsindirildi
ShYMKENT. QazAqparat - Ońtústik Qazaqstan oblysynda sharýalarǵa sýbsıdııa alýdyń sharttary túsindirildi. Alqaly jıynda oblystyq aýyl sharýashylyǵy basqarmasynyń basshylyǵy bıylǵy jyly asyl tuqymdy iri qara men bordaqy basyna beriletin qarjy kólemi artqanyn jetkizdi, - dep habarlaıdy QazAqparat HAA tilshisi.
Sala mamandarynyń sózinshe, aǵymdaǵy jyly memlekettik sýbsıdııa kólemi ózgerip otyr. Oǵan sáıkes, mal basyn myńnan asyrǵan iri qojalyqtarǵa qomaqty qarjy beriledi. Al, asyl tuqymdy iri qaraǵa beriletin qarjy 1500-den 2500 teńgege ósken. Mal bordaqylap, et óndiretin sharýalar da sýbsıdııany endi basqa sharttar boıynsha rásimdeıdi. Buryn ettiń ár kelisine qarjy alsa, budan bylaı bordaqy basyna qarjy qaralady eken. Bul ózgeris óz kezeginde et óndirýshilerge ońtaıly bolmaq, - deıdi basqarma ókilderi.
«Qoı sharýashylyǵyna da qoldaý myqty. Selektsııalyq jumys júrgizgen qojalyqtarǵa mal basyna 2500 teńgeden qarjy qaralyp otyr. Memlekettik qoldaýǵa balapan baqqan sharýa da qol jetkize alady. Eger byltyr asyl tuqymdy, táýliktik shóje úshin 300 teńge sýbsıdııa alsa, bıyl bir kúndik balapannyń ózine 400 teńgeden bólinedi. Al, arnaıy fabrıkadan jumyrtqa alyp, bastyrǵandarǵa 200 teńgeden beriledi», - deıdi oblystyq aýyl sharýashylyǵy basqarmasynyń bólim basshysy B.Batyrbekuly.
Sýbsıdııalaýdyń jańa jobasy ásirese, iri qojalyq ıelerine tıimdi bolmaq. Olarǵa sútti ári etti júz sıyrynyń ár basy úshin 18 myń teńge sýbsıdııa tólenedi. Al, iri qarasy 3 myń bastan assa, qarjy eki esege artady.
«Bul ózgeris durys boldy. Buryn etke beriletin qarjyny kútetinbiz. Qazir mal basyna berilse, jem - shóp alýǵa kómek bolar edi», - deıdi jergilikti sharýa qojalyǵynyń tóraǵasy D. Baımenov.
