OQO-da sharýalar tańqýraıdan tabys taýyp otyr
ShYMKENT. QazAqparat - Ońtústik Qazaqstan oblysyndaǵy taýly aımaq turǵyndary tańqýraıdan tabys taýyp otyr. Qazyǵurttyq dıqandar óńirde alǵash ret tańqýraı ósirýdiń tyń ádisin meńgerýde , dep habarlaıdy QazAqparat HAA tilshisi.
Jigirgen aýylynyń turǵyny Erkin Sheralıev aýa raıyna sáıkes kelgen soń jıdektiń osy túrin egýdi qolǵa alǵanyn aıtady. Ol bastapqyda bir jarym gektar jerge tańqýraı egip, mol ónim jınaǵan. Bıyl onyń kólemin eki esege artyrypty. Ári ony baptaýǵa aýyldyń 30-dan astam turǵynyn tartqan. Kútimi jaqsy bolǵanda ónim de molaıady, - deıdi dıqan. Onyń sózinshe topyraǵy jaqsy tyńaıǵan kezde tańqýraı 2 aıda bir ónim beredi. Jıdektiń ár túbinen 3 kelige deıin, al kúzde 1 gektardan 12 tonnaǵa deıin ónim alýǵa bolady dep otyr. Al, daıyn ónimdi kóterme baǵamen alýshylar da tabylypty. Óıtkeni, jıdektiń adam aǵzasyna paıdasy jeterlik.
«Tańqýraıdy byltyr bir jarym gektar jerge egip, aýyldyń 12 adamyn jumyspen qamtydyq. Bıyl taǵy 1,5 gektarǵa egip, aýmaǵyn keńeıttik. Saldarynan 25-30 adamdy jumyspen qamtamasyz etemiz. Daıyn ónimge suranys ta jaqsy. Osy mańdaǵy Qaratas eldi mekeninde bir kásipker tosap shyǵaratyn tseh ashqan. Oǵan biz terip, jınap beremiz. Ol kisi ózi kelip alyyp ketedi»,-deıdi Erkin Sheralıev.
Sharýa endi tabysy mol jıdekti 15-20 gektarǵa keńeıtýdi josparlap otyr. Ol úshin aýyl turǵyndarymen birigip kooperatıv quryp, egistik jerlerin paıdalanbaq.
