OQO-da sharýalar 1,3 mln tonna baqsha ónimderin jınady
ASTANA. QazAqparat - Bıyl Ońtústik Qazaqstan oblysynda aýyl sharýashylyǵy eńbekkerleriniń kúnine arnalǵan mereke erekshe atalyp ótti. Buǵan sebepte bar. Óıtkeni agrarly aımaqtyń sharýalary 376,5 mlrd teńgeni quraıtyn aýyl sharýashylyǵy ónimin óndirdi. Bul ótken jylǵymen salystyrǵanda 57 mlrd teńgege kóp, dep habarlaıdy Ońtústik Qazaqstan oblysy ákimdiginiń baspasóz qyzmeti.
Baspasóz málimetterine qaraǵanda, ońtústiktiń dıqandary bıyl 400 myń tonnaǵa jýyq astyqty qambaǵa quısa, 116 myń tonna jemis-jıdek pen 919 myń tonna kókónis, 295 myń tonna kartop, 1,3 mln tonna baqsha ónimderin jınady.
Sondaı-aq, aýyl sharýashylyǵy ónimderiniń egis kólemi ótken jylmen salystyrǵanda 29 myń ga-ǵa artyp, 818 myń ga qurady.
Ońtústik Qazaqstan oblysyndaǵy mal sharýashylyǵy salasynyń eńbekkerleri de bıylǵy jyldy tolaǵaı tabystarmen aıaqtap otyr. Óıtkeni óńirde iri qara mal sany ótken jylmen salystyrǵanda 5,8 paıyzǵa, qoı men eshki 1 paıyzǵa, jylqy 19,5 paıyzǵa artqan. Óńirdegi mal basynyń ósýine «Sybaǵa» baǵdarlamasy da óz septigin tıgizip otyr. Atalǵan baǵdarlamamen bıyldyń ózinde 13 087 bas mal satyp alynsa, «Altyn asyq» aıasynda 23 352 bas qoı, «Qulan» baǵdarlamasy aıasynda 2 366 bas jylqy satyp alynǵan. Mal basyn satyp alýda Ońtústik óńiri respýblıkada 1 orynda tur.
