OQO-da Shardara qalasynyń kúni atalyp ótti
ShYMKENT. QazAqparat - Ońtústik Qazaqstan oblysynda Shardara qalasy kúni toılandy. Aıtýly kúni qalaǵa aýyl sharýashylyǵy ónimderiniń jármeńkesi uıymdastyrylyp, ondaǵy taýarlar bazar baǵasynan arzan satyldy. Túrli sporttyq saıystar men kóńildi án keshteri uıymdastyryldy, dep habarlaıdy QazAqparat tilshisi.
Jármeńkede Jaýshyqum aýylynyń dıqandary 5 tonna pııazdyń ár kelisin 65 teńgeden puldady. Qaltaǵa qonymdy baǵada usynylǵan ónim aınalasy bir saǵattyń ishinde taýsyldy. Sol sııaqty, bolgar buryshynyń kelisi 100 teńge, kartop -100, sábiz - 110, kapýsta - 90, kúrish 160 teńgeden satyldy. Mal sharýashylyǵy jolǵa qoıylǵan aımaqta sıyr men qoı eti 1200 teńgege satyldy. Sonymen qatar, balyq ónimderi de jármeńke sóresinen tabyldy.
«Mine ózderińiz kórip otyrsyzdar, Jaýshyqumnan kelgen ónimniń ózi tez arada taýsylyp, qazir taǵy da ákelýge ketti. Basqa da ónimder óte tez ótip jatyr, halyqtyń suranysymenen. Halyq razy barlyǵyna»,- deıdi Shardara qalasy ákiminiń mindetin atqarýshy Jalǵas Nurymbet.
Mereke aıasynda qala qurylysyna eńbek sińirgen ardagerlerge arnap as berildi. Olar ózderine kórsetilgen qurmetke dán rıza. Aıtýly shara aýdandyq dene shynyqtyrý jáne sport bólimi uıymdastyrǵan saıystarǵa ulasty. Shardaralyqtar «Alty alash» alańyndaǵy kórmeniń de kýási boldy.
Aıta keteıik, Shardara qalasyn úlken týrıstik ortalyqqa aınaldyrý josparlanyp otyr. Eńbeksúıgish halqymen Odaq kóleminde dańqy shyqqan shahar turǵyndarynyń búginde birligi bekem. Aıtýly kúnge oraı aýdan ónerpazdary kontserttik baǵdarlama usyndy. Kesh sońynda ásem án men tátti kúı kóńilin terbegen qalalyqtar merekelik ot shashýdy tamashalady.
