OQO-da shalǵaıda jatqan aýyl basqa aýdanǵa aýystyrýdy surap otyr
ShYMKENT. QazAqparat - Ońtústik Qazaqstan oblysynda bútin bir aýyl bılik oryndarynan basqa aýdanǵa aýystyrýyn surap otyr, dep habarlaıdy «QazAqparat» HAA tilshisi.
Saryaǵash aýdanyna qarasty Qalǵansyr aýyly aýdan ortalyǵynan 150 shaqyrym qashyqtyqta ornalasqan. Kezinde Ózbekstanǵa 50 jylǵa jalǵa berilgen aýyl 1993 jyly Qazaqstanǵa túpkilikti qaıtarylǵan. Sodan beri myńǵa jýyq turǵyny bar eldi mekenniń áleýmettik jaǵdaıy kúrt nasharlap ketken. Shalǵaı jerde sapaly aýyz sý, elektr jaryǵy men jol máselesi sheshimin tappaǵan. Al, hat-habar men basylymdar jyldar boıy jetkizilmeı keledi. Mundaǵy jurt tirshilik nárin Syrdarııa ózeninen tasyp, qudyqqa quıyp ishedi. Las sýdy ishkendikten, balalar arasynda búırek aýrýy jıilep ketken. Shamasy kelgender irgedegi Shardara aýdanynan taza sýdy aldyrtyp, paıdalanatyn kórinedi.
«Biz 17 shaqyrym qashyqtyqtaǵy Shardara aýdanyna qarasaq, halqymyzǵa jol da bolar edi, sý da bolar edi, gazet-jornal alýǵa bolar edi, aýylymyz alys bolǵandyqtan bizge Qazposhta gazet jornal tasyp bermeıdi», - dep ashynady aýyl turǵyny Yntyqbaı Sahov.
Jergilikti halyqtyń sózinshe olarǵa 150 shaqyrym jerdegi Saryaǵash emes, 17 shaqyrym qashyqtyqtaǵy Shardara aýdanyna qatynaǵandary yńǵaıly. Aýyldyń úlkenderi osy máseleni aıtyp ákimdikke barǵanda, Saryaǵash aýdany ákiminiń ákimshilik shekarasyn ózgertý týraly qaýlysy men sheshimi shyqqan. Biraq, sol kúıi oryndalmaı qalypty.
«Qalǵansyrdyń máselesinen habardarmyz. Halyqtyń usynysy ábden zerdelengen. 2014 jyly aýyldy jalpy paıdalanýdaǵy 1114 gektar jerimen Shardara aýdanyna ótkizý jaıly sheshim-qaýly shyǵyp, qabyldanǵan. Qaýly oblys ákimdigine, oblystyq máslıhattyń hatshylyǵyna usynylǵan. Qazirgi tańda, tıisti jumystar atqyrylyp jatyr», -deıdi Saryaǵash aýdany ákiminiń orynbasary Qudiret Qystaýbaev. 
Aınur Aqbaeva
