OQO-da «Saıasatker áıelder klýby» jumys isteıdi
ShYMKENT. QazAqparat - Ońtústik Qazaqstan oblysynda oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń kezekti keńeıtilgen otyrysy boldy, dep habarlaıdy aımaq ákimdiginiń baspasóz qyzmeti.
Qazaq qoǵamynda qyz-kelinshekterdiń alatyn orny qashanda erekshe. Bala tárbıesi, úı sharýasy jáne zaman talabyna saı qoǵamdyq qyzmet. Sonyń ishinde názik jandylardyń memlekettik qyzmettegi úles salmaǵy men kóshbasshylyq múmkindikterin arttyrý - demokratııa úrdisterine qurylǵan elimizde kúnniń basty máselesine aınaldy. Negizgi taqyryp oblys ákimi janyndaǵy áıelder isteri jáne otbasylyq-demografııalyq saıasat jónindegi komıssııanyń kezekti keńeıtilgen otyrysynda kóterildi. Onda áleýmettik jáne saıası ómirdegi áıelderdiń róli, genderlik teńdik jaıy da aıtyldy.
Statıstıkalyq málimetterge súıensek, Ońtústik óńirde basshylyq qyzmettegi áıelder qatary ózge óńirlerge qaraǵanda tómen. Máselen, oblysta túrli deńgeıdegi máslıhattarda 315 depýtat bolsa, sonyń 16-sy ǵana - qyz-kelinshekter. Kópshilik pikirinde qalyptasqandaı, mektep dırektorlarynyń da basym bóligi názik jandylar emes. Olar óńirdegi 1022 mekteptiń 20%-yn ǵana basqarady. Búginde Respýblıka boıynsha barlyq oblystarda osy olqylyqtardyń ornyn toltyrý úshin «Saıasatker áıelder klýby» jumys isteıdi. Onyń negizgi qyzmeti - memlekettik jáne saıası-qoǵamdyq qyzmetterge usynýǵa bolatyn áıelderdiń kadrlyq qoryn qalyptastyrý, kóshbasshy arýlar mektebiniń jumysyn uıymdastyrý bolyp tabylady.
