OQO-da saıahatshy Birkólik taý shatqalynda joǵalyp ketti
ShYMKENT. QazAqparat - Ońtústik Qazaqstan oblysynda saıahatshy joǵalyp ketti. 30 jastaǵy Qasymbek Qudasov Birkólik taý shatqalynyń «Galkına» asýyna shyǵyp, qaıtyp oralmaǵan, dep habarlaıdy QazAqparat HAA tilshisi.
Óńirdiń tótenshe jaǵdaılar qyzmetine saıahatshynyń joǵalyp ketkeni týraly kelesi kúni habar túsedi. Oqıǵa ornyna jedel-izdestirý jasaǵynyń 5 adamy 1 tehnıkamen jetip, janynda bolǵan kisilerden joǵalǵan azamat týraly surastyrǵan. Belgili bolǵandaı, Shardara aýdanynyń turǵyny jerlesterimen birge saıahattap kelgen eken. 15-shi shilde kúni «Galkına» asýyna bet alǵan saıahatshy sol kúıi habarsyz ketipti.
Osydan keıin qutqarýshylar Birkólik taý shatqalynyń asýlaryn izdestirgen. Olardyń qataryna Tóle bı aýdanynynyń 2 qutqarýshysy men joǵalǵan saıahatshynyń 12 tanysy qosylǵan.
Alaıda bul toptyń túske deıingi izdestirý sharalary nátıje bermeıdi. Bolmaǵan soń iz kesýshilerge taǵy 7 adam men 2 tehnıka joldanǵan. Qutqarýshylar tek keshki 17.45-te ǵana joǵalǵan azamatty taba alǵan. Ol lageri bazasynan 3 shaqyrymdaı jerge ketip qalypty. Onyń sol aıaǵy synyp eshqaıda qozǵala almaı qalǵany belgili boldy. Jaraqat alǵan saıahatshyǵa alǵashqy medıtsınalyq járdem kórsetilip, aýrýhanaǵa jetkizildi.
