OQO-da sarapshylar latyn álipbıine kóshý máselesin talqylady
Basqosýǵa Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynyń taldaý mamandary, oblystyń zııaly qaýym ókilderi men joǵary oqý oryndarynyń oqytýshylary men stýdentteri, til mamandary qatysty.
Qazaqstannyń strategııalyq zertteýler ınstıtýty men OQO ishki saıasat basqarmasynyń uıymdastyrýymen ótken talqylaýda Qazaqstannyń Strategııalyq zertteýler ınstıtýtynyń «Áleýmettik-saıası zertteýler» bóliminiń jetekshisi Alýa Joldybalına latyn álipbıine kóshýdiń joldary jáne álemdik deńgeıdegi latyn álipbıiniń mańyzdylyǵyn naqty ǵylymı aıǵaqtarmen aıtyp ótti.
Sondaı-aq, latyn álipbıine ótken memleketterdiń tájirıbelerin kórsetip, oǵan ótý jalpy orta eseppen 12-15 jyl ýaqyt talap etetindigin jáne latyn álipbıine kóshý barysynda qazaq tiliniń úndestik zańdylyqtaryn saqtaý qajettigine toqtaldy.
Al, halyqaralyq «Alash» syılyǵynyń laýreaty Marhabat Baıǵut latyn álipbıne kóshý ýaqyttyń talaby ekendigin aıtyp, usynylǵan 25 áripterdi eshqandaı ózgeristerge ushyratpaı sol qalpynda qaldyrýdy qoldaıtyndyǵyn jetkizdi.
Sonymen qatar, fılologııa ǵylymdarynyń doktory, professor, Muhtar Áýezov atyndaǵy OQMÝ-dyń fılologııa fakýltetiniń dekany Bolatbek Tileýberdıev latyn álipbıine kóshýdiń qazirgi jastar úshin jańa zamanaýı tehnologııany ıgerýdiń birden-bir joly ekendigin aıtty. Oqý ornynyń jaratylystaný fakýltetiniń 3 kýrs stýdenti Alısher Hamraev latyn álipbıine kóshýdi jastar qoldaıtyndyǵyn jáne túrki tildes memleketter arasyndaǵy qarym-qatynastyń nyǵaıýyna zor múmkindik beretinin aıtyp ótti.
