OQO-da salyq túsimi 10 aıda 251 mlrd teńgeni qurady
Belgilengen jospar 245 mlrd teńge bolsa, bıýdjetke naqty 251 mlrd teńge óndirilgen, dep habarlaıdy óńir basshysynyń baspasóz qyzmeti.
Búgin bul týraly OQO óńirlik kommýnıkatsııalar qyzmetinde ótken brıfıngte oblystyq Memlekettik kirister departamentiniń basshysy Altynsary Úmbetalıev málimdedi.
Departament basshysynyń aıtýynsha, memlekettik bıýdjet túsimderiniń ósý qarqyny 2016 jyldyń osy kezeńimen salystyrǵanda edáýir artyp keledi.
«Respýblıkalyq bıýdjetke mejelengen jospar 151 mlrd teńge bolsa, ol 101 paıyzǵa oryndalyp, 152 mlrd teńgeni qurady. Al, jergilikti bıýdjet boıynsha, 94 mlrd teńge josparlansa, naqty 99 mlrd teńge óndirildi. Nátıjesinde jospar 106 paıyzǵa oryndalyp, jergilikti bıýdjet qorjynyna artyǵymen 5 mlrd teńge qarjy tústi», - dedi Altynsary Dúısenbekuly.
Sonymen qatar, qazirgi tańda Ońtústik Qazaqstan oblysynda 216 myńnan astam shaǵyn jáne orta bıznes ókilderi jumys atqaryp keledi. Osy sýbektilerden aǵymdaǵy jyldyń 10 aıynda memlekettik bıýdjetke 104,6 mlrd teńge kóleminde salyq túsken. 
Elbasy tapsyrmasyna oraı, oblystyq Memlekettik kirister departamenti tarapynan salyqtyq tekserýler sany 2017 jyly byltyrǵy jyldyń osy kezeńimen salystyrǵanda 57 paıyzǵa kemigen. Sondaı-aq, aǵymdaǵy jyldyń 10 aıynda kedendik tólemder men salyqtar boıynsha jospar 100 paıyzǵa oryndalyp, 51 mlrd teńgeni qurap otyr.
Budan bólek, oblystyń syrtqy taýar aınalymy aǵymdaǵy jyldyń osy kezeńinde 1 mlrd 438 mln AQSh dollaryn qurady. Onyń ishinde taýar eksporty 5 paıyzǵa, al taýar ımporty 36 paıyzǵa kóbeıgen.
