OQO-da «Rosatomnyń» shaǵyn sý elektr stantsııalary salynady
ShYMKENT. QazAqparat - Ońtústik Qazaqstan oblysynda «Rosatomnyń» shaǵyn sý elektr stantsııalaryn salý isi qolǵa alynady. Bul jobany «Shymkent» áleýmettik-kásipkerlik korporatsııasy júzege asyrady, dep habarlaıdy QazAqparat HAA tilshisi.
«Shymkent» ÁKK men «Rosatom Ortalyq Azııa» aımaqtyq ortalyǵy ózara túsinistik pen áriptestik kelisimine qol qoıdy. Onyń maqsaty - Ońtústik Qazaqstan oblysynda shaǵyn sý elektr stantsııasy men basqa da balamaly energııa salasyn damytý, sondaı-aq, tabıǵat qoryn tıimdi paıdalaný men saqtaý bolyp otyr. Qujatqa «Shymkent» ÁKK basqarma tóraǵasy Aıtmuhammed Aldajarov pen «Rosatom Ortalyq Azııa» bas dırektory Vıtalıı Dragýnov qol qoıdy.
Taraptar Ońtústiktiń taýly aımaqtarynda qýatty 2MVt-qa deıingi, konteıner tıptes shaǵyn sý stantsııalaryn salýdyń pılottyq jobasyn birge qurmaq. Kelisilgen áriptestik boıynsha 2017 jyldyń qyrkúıek aıynyń ózinde mamandar stantsııalardy salýǵa jáne sý jınaý qurylǵysy men konteınerlerdi ornatýǵa qolaıly oryndardy anyqtaý úshin alǵashqy tehnıkalyq is-saparmen kelýdi josparlap otyr.
Konteınerdegi shaǵyn SES shyǵarýmen «Rosatom» memlekettik korporatsııasy «Atomenergomash» kompanııasynyń quramyna kiretin Vengrııanyń Ganz Engineering and Energetics Machinery llc. (Ganz EEM) kompanııasy aınalysady. Shaǵyn SES-terdi turǵyndary elektr jelisine qosylmaǵan aımaqtarda qoldanýǵa bolady. Shaǵyn SES týrbınasy jáne basqarý tetigi bar konteınerler jetkizilgen soń bir aıdan keıin 1MVt-qa deıin elektr energııasyn óndire alady. Aıta keteıik, shaǵyn SES qashyqtyqtan, spýtnıkalyq baılanys arqyly basqarylady. Qazir shaǵyn SES-terdi ózge elderge eksporttaý boıynsha kelissóz júrgizilýde.
Aıta keteıik, Ońtústik Qazaqstan oblysynyń taý ózenderiniń mol áleýetin eskergen qos tarap alǵashqy joba aıaqtalǵan soń da ári qaraı birge jumys istep, jergilikti ákimdikpen shaǵyn sý energetıkasy salasyndaǵy basqa da jobalardy júzege asyrýǵa nıetti.
